Klubi Kulturor

E vetmja jetë njeriu dhe të Dërguari që është studiuar e analizuar tërësisht është ajo e Muhamedit, lavdërimi dhe paqja e Allahut qoftë mbi të. Çdo fjalë, vepër ose pëlqim i tij ruhet i shënuar për të përbërë kështu pjesën më të ndershme të shkruar në histori.
   Jeta e tij është shembull brez pas brezi deri në Ditën e Gjykimit. Në Kuran për të thuhet: “Me të vërtetë ti je me një moral më të lartë.” (Kalem, 4)
   Ai nuk ishte vetëm një mësues që e mëson Kuranin vetëm me fjalë, por ai ishte edhe një shembull i gjallë që e jetonte atë (Kuranin). Sipas transmetimit të shokëve të tij, Muhamedi, lavdërimi dhe paqja e Allahut qoftë mbi të, kishte karakterin më të bukur dhe ishte njeriu më i butë; çdo herë e shihje duke buzëqeshur, fytyra çdo herë i shndriste nga drita. Ai ishte aq i kujdesshëm, saqë vetë personalisht u shërbente musafirëve.
   Ai njihej për mëshirën që kishte ndaj bonjakëve, ndaj atyre që ishin të pambrojtur dhe ndaj të vejave. Enesi, Allahu qoftë i kënaqur me të, rrëfen: “ I kam shërbyer të Dërguarit të Allahut plot dhjetë vite. Nëse kam pasur ndonjë të metë gjatë punës sime, asnjëherë nuk më ka thënë: “Sikur ta bëje këtë kështu.” Shënon Muslimi.
   Ai u mundua vazhdimisht për të varfrit, për t’ua zvogëluar atyre mungesën e pasurisë materiale. Në mesin e shokëve të tij kishte njerëz të pasur. Për shkak se pasurinë, pozitën, jetën e flijuan për hir të rrugës së Allahut, merituan lëvdata nga i Dërguari i Allahut. Për ta, Allahu i Lartësuar thotë: “Allahu bleu prej besimtarëve shpirtrat dhe pasurinë e tyre me xhenet.” (Tevbe, 111)
   Në këtë mënyrë, Allahu u premtoi xhenetin për shkakun se ata dhanë pasurinë dhe jetën në rrugën e Tij. Të pasurit që janë mirënjohës, të mëshirshëm, dorëshlirë dhe të varfrit krenarë e me karakter janë të barabartë para Allahut të Lartësuar.
   Jeta e të Dërguarit të Allahut është e mbushur me raste të cilat tregojnë për mëshirën, butësinë, sinqeritetin. Ai është shembull i pakrahasuar për të gjithë njerëzit; është shembull si lider fetar, si udhëheqës i shtetit, është shembull i durimit dhe i mbështetjes tek Allahu në kohë dhe në situata të vështira, është shembull i zemërgjerësisë dhe bujarisë, i mëshirës ndaj familjes.
   Nëse je i pasur, parafytyro të Dërguarin, i cili ishte pronar i gjithë Arabisë dhe të gjithë të parët e arabëve e përshëndetnin me respekt, kurse ai ishte modest dhe zemërgjerë. Nëse je i dobët, atëherë mendoje të Dërguarin e Allahut derisa ishte në Mekë nën sundimin e politeistëve.
   Nëse je nxënës, parafytyroje të Dërguarin të ulur para Xhibrilit, i cili i sillte shpalljen. Nëse je një këshillues dhe një udhërrëfyes besnik, atëherë dëgjoje të Dërguarin duke i këshilluar me urtësi shokët e vet. Hape veshin dhe zemrën dhe dëgjoje zërin e ëmbël të tij.
   Nëse dëshiron të mbrosh drejtësinë, të ftosh në drejtësi dhe ta ngresh atë lart dhe për këtë nuk ke asnjë ndihmëtar, atëherë shikoje jetën e të Dërguarit në Mekë, kur ai nuk kishte asnjë ndihmëtar kur ftonte politeistët në shpëtim duke u shpallur të vërtetën.
   Nëse nuk ke askënd, atëherë përfytyroje bonjakun (jetimin) e vetëm të Abdullahut e të Emines. Nëse je bashkëshort, atëherë përfytyro të Dërguarin, bashkëshortin e ndershëm dhe bujar të Hatixhes dhe të Aishes, Allahu qoftë i kënaqur me të dyja, për butësinë, dashurinë, mirëkuptimin e pashoq ndaj tyre. Nëse je prind, atëherë mëso sjelljen e tij si baba i Fatimes.
   Cilado qofshin cilësitë e tua, kudo që ti e gjen veten, në mëngjes ose mbrëmje, në çdo çast e moment, do ta gjesh të Dërguarin si udhërrëfyesin më të mirë, që të drejton në rrugën e drejtë.
   Me të vërtetë jeta e tij i ngjason një buqete lulesh të rralla e të bukura me erë mahnitëse. Në qoftë se ju bie në sy një sistem që me drejtësi i rregullon marrëdhëniet ndërmjet njerëzve, në qoftë se ka një mëshirë dhe butësi që i lidh zemrat e njerëzve ose nëse në një vend të pasurit me mëshirë vrapojnë në ndihmë të të varfërve, të fuqishmit i mbrojnë të dobëtit, të shëndoshët i ndihmojnë të sëmurët, të pasurit i ruajnë bonjakët e i ushqejnë të vejat, pa kurrfarë dyshimi të jeni të bindur se këto cilësi janë të Muhamedit, lavdërimi dhe paqja e Allahut qoftë mbi të, dhe të atyre që pasojnë rrugën e tij.
   Allahu na bëftë prej atyre që e studiojnë me kujdes jetën e Muhamedit, lavdërimi dhe paqja e Allahut qoftë mbi të, dhe përpiqen ta marrin shembull në jetën e tyre!

Përgatiti: Almedin Ejupi
18.4.2008

Materiale te tjera

Vitrina e librit

Desktop Poster

Webfaqe Islame

Abonohu

Kursi Islam

Dëgjo Kur'an

Për ty motër

Na shkruani