Klubi Kulturor

Fetva dhe Këshilla / Këshilla dhe Konsulta / Probleme gjatë aplikimit të Islamit

A mundem që si kundërvlerë të marrë lëngun e rrushit joalkoolik ?

21.12.2009 19:58:17

Pyetja:

A është e lejuar që të dërgohet rrushi aty ku prodhohet alkooli dhe pijet e tjera joalkoolike nga rushi. Pyetja ime është a mundem unë të dërgoj rrushin në këtë vend dhe si kundërvlerë të marrë lëngun e rrushit joalkoolik e ashtuquajtur shira?

Përgjigja:

Falenderimet i takojnë Allahut, paqja dhe bekimet e Tij qofshim mbi të dërguarin e Tij Muhamed, mbi familjen, shokët dhe të gjithë ata që ndjekin rrugën e tij deri në Ditën e Gjykimit.

Vëlla i nderuar!

Transmetohet se Enes ibën Maliku ka thënë: “Resulullahu (salallahu alejhi ue selem) në çështjen e alkoolit i mallkon dhjetë lloje të njerëzve: ai që e shtrydh atë, atij që i shtrydhet ajo, ai që e pi, ai që e bartë, atij të cilit i bartet, atij që i serviret, ai që e shet, ai që ha nga fitimi i tij, ai i cili e blen, atij të cilit i blehet.” (Transmeton Tirmidhiu)

Pastaj rregulli i përgjithshëm në sheriatin islam është që muslimanët duhet të ndihmojnë njëri tjetrit në punë të mira e jo të ndihmohen në mëkate. Ashtu siç sqarohet ky rregull në ajetin kuranor : “...Ndihmohuni mes vete me të mira dhe në të mbara, e jo në mëkate e armiqësi...” (Maide, 2)

Duke i patur parasysh këto që u përmendën më lartë dhe argumente të tjera është e ndaluar që ju ta dërgoni rrushin në fabrikë ku prodhohen pije alkoolike dhe joalkoolike, pa marrë parasysh se çfarë ju merrni si kompenzim, para, apo lëngje joalkoolike, pasi rrushi të cilën ju e dërgoni në këtë fabrikë apo me një sasi nga ajo ata do të prodhojnë pije alkoolike. Prandaj themi se kjo është haram. Allahu e di më së miri.

Alaudin Abazi

16.02.2006