Pyetja:

Selam alejkum ue rahmetullahi ue berekatuhu!
Inshallah nuk ju bezdis që ju shkruaj, por mua personalisht m’u duk një gabim në pyetjen e parashtruar nga një lexuese e cila kërkon sqarim për agjërimin e së hënës dhe së premtes, apo ndoshta edhe unë jam gabim. Nga ajo që kam lexuar deri tash është thënë se nuk lejohet të agjërohet dita e premte veçmas, apo ndoshta mendohet këtu të hënën dhe të enjten?
Fjala është për këtë pyetje: A mund të agjëroj të hënën dhe të premten apo ditë pas dite?
http://www.klubikulturor.com/pyetje/2009/a_mund_te_agjeroj_te_henen_dhe_te_premten_apo_dite_pas_dite.htm

Ju lutem nëse është gabim atëherë përmirësoni e nëse jo, ju lutem me falni për pengesën që ju shkaktova. Por dihet se faqja juaj lexohet shumë dhe për atë mos të merret si rregull kjo dhe të agjërohet të premten veçmas.
Me nderime dhe respekt të madh ndaj punës tuaj.


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Allahu ju shpërbleftë për interesimin dhe shkrimin tuaj, pasi vërtet mund të keqkuptohet kjo përgjigje, prandaj do ta sqarojmë edhe paqartësinë tuaj.
Është e vërtetë se ndalohet veçimi i ditës së premte me agjërim ashtu si ndalohet të veçohet dita e shtunë. Në anën tjetër, nëse këto ditë i agjërojmë së bashku me ditën përpara ose mbrapa, atëherë sipas mendimit të saktë të dijetarëve nuk ka të keqe. Pra, ky është rregulli për të cilin ju bëni vërejtje, mirëpo ju duhet ta dini se kjo dispozitë e tëra ka të bëjë nëse agjërojmë nafile dhe jo agjërimi farz. Me fjalë të tjera, nëse ne agjërojmë ditën e premte veçmas ose ditën e shtunë, por ky agjërim është kaza e ditëve të paagjëruara të Ramazanit, atëherë në këtë nuk ka të keqe dhe kjo nuk ndalohet. Prandaj pyetja e mëhershme e parashtruar nga pyetësja ka të bëjë për agjërimin kaza të ditëve të paagjëruara të Ramazanit dhe jo për agjërimin nafile. Sido që të jetë, Allahu ju shpërbleftë për interesimin tuaj!
 

Alaudin Abazi
11.10.2009