Pyetja:

Selam alejkum ue rahmetullah!

Meqenëse ne femrat dihet që jemi në mungesë të agjërimit të plotë të muajit Ramazan, desha të filloj të agjëroj në plotësimin e asaj ç'ka jam në borxh para Allahut xheleshanuhu. Ju lutem më tregoni a mundem të agjëroj të hënën dhe të premten apo ditë pas dite? Si duhet bërë nijeti?


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Në lidhje me agjërimin kaza të atyre ditëve të mbetura të Ramazanit, nuk ekziston ndonjë formë e caktuar se si duhen agjëruar. Nëse dëshiron, besimtari mund t'i agjërojë pa ndërprerje, nëse do duke pushuar, ashtu si i leverdis atij dhe si i duket më e lehtë. Prandaj ju mund të përzgjidhni ditët që ju përshtaten dhe t'i agjëroni. E domosdoshmja është që të mos ju arrijë Ramazani i vitit të ardhshëm pa i kompensuar ato ditë, edhe pse më e drejtë për ju është që sa më shpejt ta largoni nga vetja këtë borxh.

Edhe për bërjen nijet nuk ekziston ndonjë akt i veçantë që duhet ta kryeni dhe nuk është e nevojshme ta thoni me gojë nijetin, por mjafton që ta vendosni me zemër agjërimin e ditës të cilën doni ta agjëroni, p.sh. nëse nesër do të agjëroni, atëherë ky vendim i juaji është nijeti, pastaj ngritja juaj në syfyr dhe gjërat e tjera aludojnë në nijetin e kërkuar. Allahu e di më së miri!