Hadithi i 25-të

Ebu Seid el Hudrij, Allahu qoftë i kënaqur me të, thotë: “Dëgjova të Dërguarin e Allahut, lavdërimi dhe shpëtimi i Allahut qoftë mbi të, të thotë: “Kush nga ju sheh një të keqe, le ta ndryshojë me dorë. E, nëse nuk mundet ta bëjë këtë, atëherë me gjuhën e tij dhe nëse nuk mundet ta bëjë këtë, atëherë me zemrën e tij, porse ky është imani më i dobët.” (Shënon Muslimi)

Çfarë përfitohet nga hadithi:
Përgjegjësia e individit musliman për ta ndryshuar të keqen.
Muslimani nuk merr pjesë tek e keqja.
Muslimanët dallohen për nga mundësitë e tyre për ndryshimin e së keqes.
Besimi (imani) është disa shkallësh.
Kush nuk e ndryshon të keqen as me zemrën e tij, kjo paraqet rrezik për të.


Hadithi i 26-të

Enesi, Allahu qoftë i kënaqur me të, thotë se e ka dëgjuar të Dërguarin e Allahut, lavdërimi dhe shpëtimi i Allahut qoftë mbi të, të thotë: “Secili bir i Ademit është gabimtar, mirëpo gabimtari më i mirë është ai që pendohet." (Shënon Tirmidhiu dhe ibn Maxhe)

Çfarë përfitohet nga hadithi:
Mangësitë e secilit, sado të devotshëm qofshin.
Njerëzit dallojnë mes tyre në nënshtrim (bindje) dhe në mëkate.
Domosdoshmëria e shpejtimit të pendimit dhe distancimi nga mëkatet.
Mëshira e gjerë e Allahut të Lartësuar.
Obligueshmëria e pendimit për të gjitha mëkatet.
Të mos e humbim shpresën ndaj mëshirës së Allahut të Lartësuar.
Përsëritja e pendimit sa herë që bëhen mëkate.


Hadithi i 27-të
Aishja, Allahu qoftë i kënaqur prej saj, thotë: “I Dërguari i Allahut, lavdërimi dhe shpëtimi i Allahut, ka thënë: “Mos i shani të vdekurit, ngase ata tanimë kanë shkuar atje ku e kanë përgatitur vendin e tyre." (Shënon Buhariu)

Çfarë përfitohet nga hadithi:
Të mos shahen të vdekurit.
Të mos u bëhet keq të gjallëve.
Njeriu do të japë llogari për atë që ka vepruar.
Dorëzimi i çështjes së llogarisë së njerëzve tek Allahu i Lartësuar.
Sharja e të vdekurve nuk u bën dobi të gjallëve.

Përgatiti: Almedin Ejupi
23.11.2007