Hadithi i 10-të

Sehl bin Sa’di, Allahu qoftë i kënaqur me të, thotë: “Erdhi një njeri tek i Dërguari i Allahut, lavdërimi dhe shpëtimi i Allahut qoftë mbi të, dhe i tha: “O i Dërguar i Allahut, më trego për një punë, të cilën do ta bëj, që të më dojë Allahu dhe të më duan njerëzit.” I Dërguari i tha: “Mos e lakmo (bëhu zahid në) këtë botë, do të të dojë Allahu dhe mos lakmo atë që është te njerëzit, do të të duan njerëzit.” (Shënon Ibn Maxhe)

Çfarë përfitohet nga hadithi:
Sahabët janë interesuar për dijen dhe e kanë pyetur të Dërguarin e Allahut, që të mësojnë.
Muslimani kujdeset që të arrijë dashurinë e Allahut.
Muslimani kujdeset që të arrijë dashurinë e njerëzve.
Zuhdi (asketizmi, mospasja lakmi) në këtë botë dhe çfarë ka në të sjell gjithnjë dashurinë e Allahut.
Zuhdi në atë që është në duart e njerëzve sjell dashurinë e njerëzve.
Muslimani është i kënaqur me atë që i ka ndarë Allahu.


Hadithi i 11-të
Ebu Bekrete, Allahu qoftë i kënaqur me të, thotë se e ka dëgjuar të Dërguarin e Allahut, lavdërimi dhe shpëtimi i Allahut qoftë mbi të, të ketë thënë: “Të mos gjykojë gjykatësi mes dyve duke qenë i hidhëruar.” (Shënon Buhariu)

Çfarë përfitohet nga hadithi:
Islami vendos baza për çdo sistem dhe çdo bashkëveprim.
Domosdoshmëria e të gjykuarit në rast të mosmarrëveshjeve.
Hidhërimi lë pasoja dhe ndikon gjatë të menduarit dhe gjatë procesit të gjykimit.
Gjykatësi duhet të jetë në gjendjen më të mirë kur gjykon mes njerëzve.


Hadithi i 12-të
Ebu Hurejra, Allahu qoftë i kënaqur me të, transmeton se i Dërguari i Allahut, lavdërimi dhe shpëtimi i Allahut qoftë mbi të, ka thënë: “Shenjat e munafikut janë tre: kur flet, gënjen, kur premton, s'e përmbush premtimin dhe kur i lihet një gjë amanet, e tradhton." (Shënon Buhariu dhe Muslimi)

Çfarë përfitohet nga hadithi:
Hipokrizia është një sëmundje e rrezikshme, të cilën Islami e lufton.
Hipokrizia ka shenja dhe ndër më të njohurat janë gënjeshtra në bisedë, mospërmbushja e premtimit dhe tradhtia.
Islami inkurajon për pastrimin e gjuhës, për besnikëri dhe për realizim të premtimeve.

Përgatiti: Almedin Ejupi
19.10.2007