Pyetja:

Selamu alejkum. Desha të dija për punën e rukjes. Disa hoxhallarë bëjnë rukje. Sa është e lejuar rukja? Kam dëgjuar që nuk ish mirë të bëhej rukje, se kish diçka lidhje me Ditën e Gjykimit. Selam alejkum!

Përgjigja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen, shokët dhe të gjithë ata që ndjekin rrugën e tij deri në Ditën e Gjykimit.

Rukja ose shërimi me Kuran dhe dua të Profetit salallahu alejhi ve slem është e lejuar dhe ka bazë në Islam. Allahu i Lartësuar thotë: “Ne të shpallim Kuranin, që është shërim dhe mëshirë për besimtarët.” (Isra, 72)

Prandaj leximi i Kuranit me qëllim të mbrojtjes nga magjia, mësyshi, cytjet e shejtanit dhe të xhinëve është i vërtetuar për besimtarin. Për këtë kemi rastin ku edhe vetë Muhamedit salallahu alejhi ue selem i ishte bërë magji nga një person që quhej Lebid bin Aësem. Dhe vërtetohet në Buhari e Muslim se ky ishte edhe shkaku i zbritjes së dy sureve të fundit të Kuranit, kapitujt “Felek” dhe “Nas”.
Por duhet të bëjmë dallimin ndërmjet shërimit të saktë dhe të lejuar, i cili është i argumentuar me hadithe të sakta, dhe atyre të cilët pretendojnë se bëjnë një gjë të tillë, por merren me mashtrime, me të cilat i joshin njerëzit të cilët kanë nevojë dhe kështu përfitojnë prej tyre. Për më gjerësisht për këtë lexo këtu:

http://www.klubikulturor.com/Si-mund-ta-sheroj-veten-time.htm

Kurse ajo që keni dëgjuar ju në lidhje me rukjen dhe Ditën e Gjykimit ka të bëjë me një hadith të cilin e shënon Muslimi dhe të tjerët, ku Muhamedi salallahu alejhi ve selem ka thënë:
“Në Ditën e Kiametit nga umeti im do të hyjnë në xhenet 70 mijë besimtarë pa kurrfarë llogarie e dënimi.” E kanë pyetur Muhamedin salallahu alejhi ve selem se kush janë ata. Pejgamberi salallahu alejhi ve selem u përgjigj: “Ata janë që nuk kërkojnë t`u bëhet rukje, e as nuk e përdorin kejjin (formë e shërimit mjekësor me zjarr) dhe nuk përdorin lëshimin e pëllumbave për fat, por mbështeten te Zoti i tyre.”

Në këtë hadith, Muhamedi salallahu alejhi ve selem tregon për veçoritë e atyre besimtarëve që do të hyjnë në xhenet pa u llogaritur dhe pa u dënuar; ky grup arrin 70 mijë besimtarë nga umeti i Muhamedit (salallahu alejhi ve selem) dhe janë ata muslimanë që kanë arritur t`i afrohen përsosmërisë dhe kulminacionit në mbështetjen ndaj Allahut të Lartësuar. Prandaj, nga veçoritë e tyre është se ata nuk kërkojnë nga të tjerët që t`u këndojnë atyre Kuran (pra, nuk kërkojnë nga të tjerët që t`u bëjnë rukje).
Për këtë, besimtarët të cilët shpresojnë dhe dëshirojnë të jenë në këtë grup nuk kërkojnë nga të tjerët t`u bëjnë rukje atyre, me qëllim që të arrijnë t`i realizojnë në veten e tyre ato cilësi të cilat i ka përmendur Muhamedi salallahu alejhi ve selem. Allahu e di më së miri!

Alaudin Abazi
27.04.2007