Ai që troket duhet të qëndrojë në të djathtë apo në të majtë të derës e jo përballë, sepse ka mundësi që të shohë brenda shtëpisë diçka që i zoti i shtëpisë nuk ka dëshirë të shihet në momentin kur hap derën. I Dërguari, paqja dhe bekimi i Allahut qoftë mbi të, kur trokiste në ndonjë derë, nuk qëndronte përballë asaj, por në të djathtë apo në të majtë dhe thoshte: “Es-selamu alejkum, es-selamu alejkum.”¹
Padyshim pasimi i kësaj edukatë ruan ndjenjat, por nëse kjo edukatë nuk pasohet, është shkak për armiqësi dhe hidhërim.

Duhet të jepet selam para kërkimit të lejes për të hyrë në shtëpi. Kur një njeri nuk deshi të hynte tek i Dërguari i Allahut, paqja dhe bekimi i Allahut qoftë mbi të, pa i praktikuar këto rregulla, ai i tha shërbëtorit të tij: “Dil tek ai, sepse nuk di të kërkoje leje dhe thuaji të thotë: “Es-selamu alejkum, a të hyj?”²
Po ashtu thotë: “Mos i jepni leje për të hyrë atij që nuk jep selam.”³

7- Prezantimi

Kur banorët e shtëpisë e pyesin atë që troket se kush është, ai duhet t’ua tregojë emrin e të mos thotë: “Unë.” Kur Xhabiri trokiti në derë, i Dërguari, paqja dhe bekimi i Allahut qoftë mbi të, e pyeti: “Kush je?” Xhabiri tha: “Unë”, kurse Pejgamberi, paqja dhe bekimi i Allahut qoftë mbi të, duke mos e pëlqyer këtë përgjigje, tha: “Unë, unë.”⁴
Kjo për shkak se me fjalën “unë” nuk njihet personi, që njeriu që hap derën të qetësohet me njohjen e tij dhe t’i japë më lehtë leje për të hyrë.

Ai që troket duhet ta ulë shikimin që të mos shohë brenda shtëpisë gjërat e ndaluara që nuk i lejohen t’i shikojë gjatë momenteve të hyrjes në shtëpi. Thotë Pejgamberi, paqja dhe bekimi i Allahut qoftë mbi të: “Qëllimi i kërkimit leje është që mos t’i shohësh gjërat e ndaluara që nuk të lejohen t’i shohësh.”⁵
E ulja e shikimit është prej shenjave të devotshmërisë te besimtari.

Nëse dikush thërret dikë në shtëpinë e tij përmes një thirrësi, atëherë ai shkon me këtë thirrës. Kjo njëherazi është leje për atë që të futesh brenda, aq më tepër nëse edhe të tjera argumente e vërtetojnë një gjë të tillë, si p.sh. të jetë dera e shtëpisë e hapur, këpucët e të ftuarve të tjerë të jenë para derës, që tregon se brenda ka musafirë, etj.. Pejgamberi, paqja dhe bekimi i Allahut qoftë mbi të, ka thënë: “Kur dikush të thërret në shtëpi dhe ti vjen me thirrësin, atëherë kjo thirrje është leje për ty që të hysh brenda.”⁶

Nëse troket dikush në derë dhe pronari i shtëpisë është duke u falur, atëherë ai duhet të bëjë tesbih (të thotë fjalën “Subhanallah”) me zë të lartë, e nëse është femër, atëherë rreh shpinën e dorës së majtë me dorë të djathtë. Kjo shenjë, edhe pse mund të jetë shenjë për atë që troket që të hyjë brenda, më mirë është që ai të largohet, pasi pronari i shtëpisë me këtë shenjë i bën të ditur se është duke u falur. Thotë Pejgamberi, paqja dhe bekimi i Allahut qoftë mbi të: “Kur dikush i kërkon burrit leje për të hyrë brenda, atëherë leja e tij është tesbihu, kurse leja e femrës është rrahja e duarve.”⁷ 

14- Të kërkohet leje kur hyhet te gratë e afërta⁸

Njeriu duhet të kërkojë leje prej grave të afërta8 të tij edhe brenda shtëpisë, kur dëshiron të futet në dhomën e njërës prej tyre. Kjo për arsye se mund ta gjejë nënën, motrën etj., në gjendje jo të lakmueshme, në të cilën nuk ka dëshirë ta shohë askush. Shumë transmetime janë cekur lidhur me urdhrin për kërkim leje nga nëna, kurse sa i përket gruas, nuk është obligim kërkimi i lejes prej saj, e nëse bëhet një gjë e tillë, nuk është keq. Ibën Mesudi para se të futej në dhomën e gruas së tij, kollitej e pastaj futej brenda.
Këto ishin katërmbëdhjetë rregullat e kërkimit të lejes para hyrjes në shtëpi. Falënderimi i takon Allahut, Zotit të gjithësisë!
 

Përktheu: Lulzim Susuri
Marrë nga libri “Enciklopedia e Edukatës Islame”
22.6.2007