Falënderimet dhe lavdërimet i takojnë vetëm Allahut subhanehu ue teala, i Cili e bëri obligim haxhin për ata të cilët kanë mundësi. Salavatet qofshin mbi të Dërguarin e Tij, Muhamedin salallahu alejhi ue selem, mbi familjen e tij, mbi shokët e tij dhe mbi gjithë muslimanët deri në Ditën e Gjykimit.
   Prej mirësive të Allahut subhanehu ue teala ndaj robërve të Tij është se ka caktuar ditë dhe kohë në të cilat ibadeti ka shpërblim shumë më të madh sesa ditëve të tjera. Ndër këto mirësi është edhe dhjetëditëshi i Dhul-hixhes. Me të vërtetë, jeta e këtij umeti (umetit të Muhamedit salallahu alejhi ue selem) është më e shkurtër sesa jeta e popujve të mëhershëm. Pejgamberi salallahu alejhi ue selem ka thënë: "Kohëzgjatja e jetës së umetit tim është mes gjashtëdhjetë dhe shtatëdhjetë (vite)." (Shih Silsile Sahiha, 385/2)
   Mirëpo, Allahu subhanehu ue teala me mirësinë dhe mëshirën e Tij e ka kompensuar këtë duke i shpërblyer disa vepra shumëfish më shumë sesa veprat e popujve të mëparshëm dhe në këtë rast muslimani ka shpërblime (nëse i punon ato vepra) si të kishte jetuar shumë e shumë vite. Si për shembull, Nata e Kadrit është më e vlefshme sesa një mijë muaj. Nëse muslimani bën ibadet në këtë natë, ai në të vërtetë ka shpërblim si të kishte jetuar shumë më shumë vite seç jeton në realitet.
   Prej ditëve të tjera në të cilat Allahu subhanehu ue teala e shumëfishon shpërblimin janë edhe dhjetë ditët e Dhul-hixhes, për të cilat kanë zbritur ajete dhe hadithe. Allahu subhanehu ue teala thotë: "Pasha agimin! Pasha dhjetë netët!" (El-Fexhr 1-2)
   Ibn Kethiri ka thënë: “Dhjetë netët e përmendura në ajet kanë për qëllim dhjetë netët e Dhul-hixhes.” Allahu subhanehu ue teala thotë: "...dhe që ta përmendin Allahun në ato ditë të caktuara." (El Haxh, 28).  Ibn Abbasi ka thënë: “Ditët e caktuara janë dhjetë ditët e Dhul-hixhes.”
   Transmeton Ibn Abbasi radijallahu anhu, se Pejgamberi salallahu alejhi ue selem ka thënë: “Nuk ka ditë në të cilat vepra e mirë është më e dashur tek Allahu sesa në këtë ditë (të Dhul-hixhes).” I thanë: “As xhihadi?” Tha: “As xhihadi, përveç nëse del ndokush me veten e tij dhe me pasurinë e tij dhe nuk kthehet me asgjë.” (Transmeton Buhariu)
   Seid ibn Xhubejri, kur hynin dhjetë ditët e Dhul-hixhes, bënte aq shumë ibadet, saqë nuk kishte mundësi më shumë. Gjithashtu, transmetohet se ka thënë: "Mos i fikni llambat tuaja dhjetë netët e Dhul-hixhes." Pra, që të bëni namaz gjatë natës dhe të lexoni Kuran.
   Ibn Haxheri në librin e tij El Fet'h thotë: "Dhjetë ditët e Dhul-hixhes janë të veçanta nga ditët e tjera për shkak se në këto dhjetë ditë bashkohen të gjitha llojet e ibadeteve, si: namazi, agjërimi, lëmosha dhe haxhi."
   Është pyetur Ibn Tejmijja, Allahu e mëshiroftë, se cilat ditë janë më të vlefshme: dhjetë ditët e Dhul-hixhes apo dhjetë netët e fundit të Ramazanit dhe është përgjigjur: “Dhjetë ditët e Dhul-hixhes janë më të mira sesa dhjetë ditët e Ramazanit, kurse dhjetë netët e fundit të Ramazanit janë më të mira sesa dhjetë netët e Dhul-hixhes."
   Nga kjo kuptojmë se ibadeti në dhjetë ditët e Dhul-hixhes është më me vlerë sesa ibadeti në dhjetë ditët e fundit të Ramazanit, pasi dhjetë netët e fundit të Ramazanit janë më të vlefshme sepse Nata e Kadrit është gjatë natës e jo gjatë ditës.
   Shpejto, o vëlla musliman, ki kujdes për çastet e këtyre dhjetë ditëve, që mos të të kalojnë kot. Pendohu tek Allahu subhanehu ue teala për mëkatet që ke bërë deri tani dhe bëj sa më shumë ibadet, fal sa më shumë namaz, agjëro, jep sadaka etj..
   Allahu subhanehu ue teala thotë: "E kush madhëron dispozitat e Allahut, ajo është shenjë e devotshmërisë së zemrave." (El Haxh, 32)
   O Allah, na lehtëso punët e mira dhe na afro tek ato dhe na vështirëso punët e këqija dhe na largo prej tyre!
E lusim Allahun subhanehu ue teala që të na mundësojë që këto dhjetë ditë t’i kalojmë në ibadete dhe të na i falë mëkatet tona! Amin!

Përgatiti: Eroll Nesimi
14.12.2007