Në emër të Allahut, Mëshiruesit, Mëshirëbërësit

Falënderimi dhe lavdërimi i takon vetëm Allahut të Lartësuar dhe salavatet tona qofshin mbi të Dërguarin tonë, Muhamedin salallahu alejhi ue selem.

Më ka nxitur ta shkruaj këtë temë një lajm i cili është publikuar në disa gazeta publike, të cilat flasin për përfitimin e disa thirrësve bashkëkohorë islamë, të cilët kanë përfituar para të majme nga daveti i tyre. Vetëm në vitin 2007, njëri prej tyre kishte fituar më shumë, 2.5 milionë dollarë!

Pasi e lexova këtë lajm, m’u kujtua fjala e Pejgamberit salallahu alejhi ue selem, që thotë: “Do të vinë disa njerëz të cilët do të hanë me gjuhët e tyre ashtu sikurse hanë lopët nga toka.” (Ahmedi, shejh Albani ka thënë se hadithi është sahih. Shih “Silsiletus-sahiha” 419). Dhe unë nuk i shoh këta thirrës ndryshe veçse prej atyre që janë cekur në hadith, që hanë me gjuhët e tyre sikurse hanë lopët nga toka!

Subhanallah! Për çdo fjalë që flasin, presin prej saj shpërblim dhe pasuri... Nuk ka asnjë gjë që bëhet vetëm për hir të Allahut apo në rrugë të Allahut!
Kështu duhet të jetë thirrja në Islam? Për çdo fjalë që flasim, çdo ajet që themi, çdo këshillë që japim, çdo ngjarje nga Kurani që tregojmë duhet të marrim pasuri dhe shpërblim?! Si të ishte kjo fe një mall me të cilën bëjmë tregti, ku mund të fitojmë pasuri dhe mund të humbim! Thërrasim në Islam aty ku kemi leverdi financiare, kurse ku nuk kemi leverdi ndalemi dhe nuk i thërrasim në Islam për hir të Allahut të Lartësuar!
E ka thënë të vërtetën Pejgamberi salallahu alejhi ue selem kur ka thënë: “Mësojeni Kuranin dhe luteni Allahun që me të (Kuranin) të fitoni xhenetin para se ta mësojë atë (Kuranin) një popull të cilët do të kërkojnë që me të të fitojnë dynjanë. Nuk ka dyshim se Kuranin e mësojnë tre grupe njerëzish: personi që ka për qëllim të fitojë autoritet me të (duke u mburrur dhe lavdëruar), personi i cili dëshiron të fitojë pasuri me të dhe personi i cili e lexon atë (dhe e mëson atë) për hir të Allahut të Madhëruar.” (Ibn Nasr në Kijam El-Lejl, shejh Albani ka thënë se hadithi është sahih. Shih “Silsiletus-sahiha” 258)

Po ashtu, Pejgamberi salallahu alejhi ue selem ka thënë: “Kush e lexon Kuranin, le të adhurojë Allahun me të sepse do të vijë një popull të cilët do ta lexojnë Kuranin dhe do të kërkojnë pasuri prej njerëzve.” (Tirmidhiu, shejh Albani ka thënë se hadithi është sahih. Shih “Silsiletus-sahiha” 257) Dhe ka thënë: “Ai i cili e mëson një dituri me të cilën arrihet kënaqësia e Allahut, mirëpo e mëson këtë dituri për qëllim të përfitimeve të kësaj bote, ai nuk do ta ndiejë erën e xhenetit në Ditën e Gjykimit.” (Tirmidhiu, Ahmedi, ibn Maxhe, Ebu Davudi, shejh Albani ka thënë se hadithi është sahih. Shih “Sahih Sunen Ebi Davud” 3105)

Si do të jetë gjendja e atyre të cilët nuk thërrasin në Islam përveç nëse kanë dobi financiare nga kjo thirrje, nga kjo ligjëratë, sikurse këta thirrës të njohur, të cilët kanë fituar shumë para nga thirrja që kanë bërë. Nuk ka dyshim se ne jemi duke jetuar ashtu sikurse na kanë treguar selefët tanë, që thanë se do të punojnë punë të ahiretit për qëllim të përfitimit në këtë botë, mësojnë fenë për qëllime të dynjasë!

Sikur këta persona këto para t’i kishin shfrytëzuar në davet (thirrje në Islam), do të ishte më mirë për ta. Ata këto para janë duke i fituar duke ua fshehur njerëzve diturinë dhe rrugën e drejtë, duke i mbrojtur qafirët dhe kufrin e tyre, disa prej tyre duke folur haptazi për ta dhe duke i mbrojtur ata, kurse disa të tjerë duke heshtur, Allahu i Madhëruar thotë: “Ata, të cilët fshehin argumentet dhe faktet që Ne i shpallëm, e pasi që ato ua sqaruam njerëzve në librin, të tillët i mallkon Allahu, i mallkojnë edhe ata që mallkojnë.”(El Bekare: 159)

“Ata që fshehin nga libri atë që shpalli Allahu dhe për të fitojnë shumë të paktë, ata në barqet e tyre fusin vetëm zjarr. Atyre Allahu nuk do t’u flasë në Ditën e Gjykimit dhe as nuk i shfajëson ata, por për ta pason dënimi i rëndë e i padurueshëm.” (El Bekare: 174)

Ne u themi këtyre thirrësve që le ta provojnë dhe le të flasin të vërtetën kundër jobesimtarëve dhe të thonë të vërtetën kundër atyre që janë zhytur në harame, se do ta shohin a do të kenë mundësi t’i fitojnë këto para për këtë kohë të shkurtër. Nuk ka dyshim se do të bëhen prej thirrësve më të varfër në atë vend.

Me këto fjalë nuk desha të tregoj për gjendjen e tyre, sepse gjendjen e tyre financiare e dinë të gjithë, mirëpo desha vetëm t’i këshilloj dhe t’u përkujtoj përfundimin e kësaj bote se që të gjithë ne do të ndahemi një ditë nga kjo botë dhe do të lëmë çdo gjë që kemi në këtë botë prej pasurisë, shtëpive, veturave etj., dhe nuk do t’i sjell dobi atij në Ditën e Gjykimit tjetër përveç veprave të tij të sinqerta, që i ka bërë për hir të Allahut të Lartësuar. E lusim Allahun e Lartësuar të na bëjë të sinqertë në veprat dhe thëniet tona, që të jetë përfundimi ynë i sinqertë, të na bëjë prej atyre që e flasin të vërtetën dhe nuk e fshehin atë. I gjithë falënderimi i takon Allahut të Madhëruar.
 

Përktheu: Eroll Nesimi
28.6.2009