Pyetja:

Përse shumica e muslimanëve janë fundamentalistë dhe terroristë?

Përgjigjja:

Kjo pyetje në shumicën e rasteve u drejtohet muslimanëve gjatë ndonjë debati fetar apo mbi çështjet botërore në formë të drejtpërdrejtë apo tërthorazi. Ç'është e vërteta, të dhëna dhe keqinterpretime të gabuara shpesh të shpijnë në diskriminim dhe në veprime të gabuara kundër muslimanëve. Një shembull i këtij lloji është fushata antimuslimane në mediat amerikane. Mediat me të dëgjuar për shpërthimin e bombës në Oklahoma njoftuan se pas atij shpërthimi fshihej një "komplot i Lindjes se Mesme'. Fajtori më vonë ishte identifikuar dhe i takonte grupit të Forcës së Armatosur Amerikane. Ta analizojmë këtë akuzë të 'fundamentalizmit' dhe 'terrorizmit' :

1. Përkufizimi i fjalës 'fundamentalist'

Fundamentalist është ai person i cili pason dhe mbështetet në themelet e doktrinës apo teorisë, mësimet e së cilës ai i ndjek.
Për t'u bërë një doktor i mirë, nga ai kërkohet dije, duhet të dijë se si t'i ndjekë ato mësime dhe në fund themelet e mjekësisë të dijë t’i vërë në praktikë. Me fjalë të tjera, ai duhet të jetë fundamentalist në rrafshin e mjekësisë. Gjithashtu edhe ai që synon të bëhet një matematikan i mirë, duhet të nxërë dituri, të jetë pasues i tyre dhe parimet e matematikës t'i zbatojë në praktikë. Ai doemos duhet të jetë fundamentalist i lëmit të matematikës. Kështu duhet të jetë edhe për atë që dëshiron të bëhet një shkencëtar i mirë, duhet të zotërojë dije dhe t'i zbatojë fondamentet e shkencës. Si rrjedhojë ai duhet të jetë fundamentalist në fushën e shkencës.

2. Nuk janë të gjithë ‘fundamentalistët’ të njëjtë

Askush nuk mund t’i pikturojë të gjithë fundamentalistët me të njëjtën furçë. Fundamentalistët askush nuk mund t'i klasifikojë si të mirë apo të këqij. Një ndarje apo klasifikim i çfarëdo fundamentalisti do varej nga fusha apo veprimtaria në të cilën ai është fundamentalist.
Një hajdut fundamentalist që shkakton dëme në shoqëri, pa dyshim se është i padëshiruar. Në anën tjetër, një doktor fundamentalist, i sjell dobi shoqërisë dhe përfiton respekt të veçantë.

3. Ndihem krenar që jam musliman fundamentalist

Unë jam një musliman fundamentalist, i cili me mirësinë e Allahut, njeh, ndjek dhe përpiqet më çdo kusht që t'i zbatojë parimet (fondamentet) islame.
Muslimani i vërtetë nuk turpërohet nga të qenët fundamentalist. Unë jam krenar që jam musliman parimor, sepse fondamentet e Islamit janë të dobishme për njerëzimin dhe mbarë botën. Nuk ekziston asnjë parim islam që do të shkaktonte dëm apo të jetë kundër interesave të racave njerëzore. Shumë njerëz ushqejnë keqkuptime rreth Islamit dhe disa nga mësimet islame i konsiderojnë si të padrejta dhe të gabuara. Kjo është si rezultat i njohurive jo të bollshme dhe jokorrekte rreth Islamit.
Nëse dikush analizon mësimet e fesë islame me seriozitet dhe pa paragjykime, ai nuk do të mund t'i ikë faktit se Islami është plot të mira për të dy nivelet; individual dhe kolektiv.

4. Kuptimi i fjalës ‘fundamentalist’

Sipas fjalori Webster, fundamentalizmi ishte një lëvizje në Amerikën protestante, e cila u ngjall në fillim të shekullit njëzet. Fundamentalizmi erdhi si reagim kundër modernizmit dhe nënvizonte pagabueshmërinë e Biblës jo vetëm në çështjet e besimit dhe moralit, mirëpo gjithashtu edhe si dokument i vërtetë historik. Është pohuar në besimin e Biblës si fjalë e vërtetë e Perëndisë. Si rrjedhojë, fundamentalizmi ishte një fjalë e cila në fillim qe përdorur për një grup të krishterësh të cilët besonin se Bibla tekstualisht ishte fjalë e Perëndisë, fjalë e cila qëndron larg çdo gabimi dhe devijimi.
Bazuar në fjalorin e Oxfordit, 'fundamentalizëm' do të thotë 'pohim i caktuar antik ose doktrinë fondamentale e çdo religjioni, veçmas e Islamit. Sot kur ndonjë individ përdor fjalën fundamentalist, mendja do t’i shkojë te një musliman, i cili është terrorist.

5. Çdo musliman duhet të jetë terrorist

Çdo musliman duhet të jetë terrorist. Terrorist është ai person apo individ i cili shkakton terror. Në çastin kur hajduti shikon policin, ai do të llahtariset. Për hajdutin polici është terrorist. Ngjashëm më këtë, çdo musliman duhet të jetë terrorist kur bëhet fjala për faktorët armiqësorë të shoqërisë, fjala vjen hajdutët dhe përdhunuesit. Sa herë që muslimani vëren ndonjë veprim të tillë kundërshoqëror, ai duhet të tmerrohet. Është e vërtetë se nocioni 'terrorist' në përgjithësi përdoret për personin i cili shkakton terror në mesin e njerëzve të rëndomtë. Mirëpo muslimani i vërtetë duhet që të jetë terrorist vetëm me njerëzit selektivë, të zgjedhurit, si për shembull më ata që janë kundër elementeve shoqërore e assesi karshi njerëzve të pafajshëm e të rëndomtë. Ç'është e vërteta, muslimani duhet jetë burim i paqes për njerëzit e pafajshëm.


6. Emërtime të ndryshme për veprime të njëjta u jepen njerëzve të njëjtë, si: ‘terrorist’ dhe ‘patriot’

Disa luftëtarë të lirisë se Indisë, të cilët nuk pranonin dhunën dhe cenimin e të drejtave, para arritjes se pavarësisë nga okupatori britanik, ishin etiketuar si terroristë. Personat e njëjtë ishin lavdëruar nga qeveria e Indisë për të njëjtat veprime dhe ishin përshëndetur si 'patriotë'. Kështu që dy etiketime të ndryshme u dhanë për individët e njëjtë dhe për të njëjtat qëllime. Njëra qeveri e quan atë terrorist, përderisa tjetra e emëron atë patriot. Ata të cilët besojnë se Britania ka të drejtë legjitime për ta sunduar Indinë, njerëzit në fjalë i etiketon si terroristë, përderisa pala tjetër, të cilët kishin mendimin se Britania nuk ka të drejtë të sundojë Indinë, këta njerëz i quajtën atdhetarë dhe luftëtarë të lirisë. Prandaj është me rëndësi që para se të gjykohet ndonjë individ, duhet që në séancën gjyqësore t'i jepet dëgjimi i drejtë. Argumentet e të dyja palëve duhen dëgjuar, ashtu siç duhen analizuar edhe rrethanat, kurse arsyet dhe qëllimet e individit duhen marrë parasysh. Atëherë personi mund të gjykohet në mënyrë të drejtë

7. Islam do të thotë paqe

Fjala Islam rrjedh nga fjala 'selaam', që nënkupton paqen. Islami është fe e paqes, fondamentet e së cilës i mësojnë pasuesit e saj ta mirëmbajnë dhe ndihmojnë paqen kudo në botë. Për këtë arsye, çdo musliman duhet të jetë fundamentalist, d.m.th. ai gjithsesi duhet t'i pasojë parimet e fesë se paqes: Islamit. Ai duhet të tregohet terrorist vetëm ndaj elementeve armiqësore, në mënyrë që ta ndihmojë paqen dhe drejtësinë brenda një shoqërie.

 

Shqipëroi nga gjuha angleze: Mr. Fehim Dragusha
8.3.2009