Prej mëshirës së Allahut ndaj nesh është edhe fakti se nuk i ka lënë çelësat e xhenetit në xhepat tanë. Sikur të ishte kështu, dikush prej nesh do t'i pengonte disa të tjerë nga hyrja në xhenet. Çdo individ me të cilin ka mospajtim do ta dëbonte nga xheneti, çdo grup apo bashkësi do t'ia mbyllte dyert e xhenetit palës, grupit tjetër, për shkak se njerëzit në shumicën e rasteve janë koprracë, ziliqarë, urryes, ashtu siç ka thënë Allahu i Lartësuar: "Thuaj: “Sikur ju të zotëronit thesaret e mëshirës së Zotit tim, edhe atëherë ju do të rrudhnit dorën nga droja, se do të shpenzoheni. Njëmend, njeriu rëndom është koprrac.” (Isra: 100)

Na shikoni në këtë botë kalimtare, të shkurtër e të përçmuar, vritemi, shahemi, grindemi e si do të ishte sikur të na dorëzoheshin çelësat e xhenetit?

Sheh se dikush prej nesh ka hapur dyqan për t'i bërë njerëzit jobesimtarë, bidatxhi, të humbur e të devijuar e më pas betohet se nuk kanë për të hyrë në xhenet. Disa të tjerë kanë vendosur trekëmbësh për varje, ku i dënon robërit e Zotit mëngjes e mbrëmje sepse ata janë mëkatarë, gjynahqarë, të dalë nga feja, jobesimtarë. Disa të tjerë po krijojnë hetime gjyqësore për robërit e Zotit, ku gjykojnë qëllimet (nijetin) dhe brendinë e tyre, hulumton biografinë e tyre, por i gjori e harron veten e vet dhe gjynahet e veta.
Disa të tjerë pretendojnë pagabueshmërinë për vete, për fraksionin dhe për pasuesit e tyre, kështu që vetëm ata do të mund të hyjnë në xhenet. Kurse e vërteta është se banorët e xhenetit do të jetë kushdo që realizon pasimin e të Dërguarit të Allahut, paqja dhe mëshira e Zotit qoftë mbi të. Kjo na kujton tregimin e Ebu Hamza el Harixhij, i cili kur shkoi në haxhillëk me një nxënës të tij, qëndroi në kodrën e Safasë dhe iu drejtua nxënësit të tij me fjalët: "Të gjithë këta haxhilerë do të jenë në zjarr dhe nuk do të hyjë në xhenet askush tjetër përveç meje dhe teje." Atëherë nxënësi i mençur i tha: "Subhanallah! Xheneti, gjerësia e të cilit është sa qiej dhe toka nuk do të hyjë askush përveç nesh? Atëherë pra, ky nuk është xheneti të cilin u ka premtuar Allahu robërve të Vet, as unë atëherë nuk do të hyj. Ky xhenet është vetëm për ty, sepse gjerësia e xhenetit të Allahut është sa qiej dhe toka, ai ka tetë dyer, gjerësia e të cilave është nga San'a deri te Bejtul Makdis, do të vijë dita e mbushur me shumë njerëz, e si pra, nuk do të hyjnë në të përveçse dy veta?!"

Sa herë që sheh armiqësi, urrejtje dhe i sheh vendimet e padrejta të njerëzve ndaj atyre që nuk pajtohen me ta, e falënderon Allahun e Lartësuar se çështja e mëshirës, e xhenetit, e pendimit dhe e faljes janë çështje që i takojnë vetëm Allahut. Ziliqarët, urryesit, shpirtligjtë, zemër sëmurët, sikur të ishte çështja e zbritjes së shiut në duart e tyre, do ta zbritnin shiun vetëm në kopshtet dhe vendet e tyre. Ata nuk shohin vetëm se me sytë e tyre dhe nuk kuptojnë vetëm se me logjikën e tyre të kufizuar. Nëse argumenti dhe dëshmitë flasin për ta, ajo është e vërtetë dhe e qëndrueshme, ndërsa nëse është kundër tyre atëherë ato dëshmi janë të paqëndrueshme dhe të pavlefshme. Kur e dashurojnë një individ, gënjejnë në lavdërimin e tij dhe i japin pozitë të lartë, ndërsa kur e urrejnë një person gënjejnë në sharjen e tij dhe i varrosin të mirat e tij.

Shumica e njerëzve janë armiq të së vërtetës. Për këtë shkak injorojnë të drejtën e Krijuesit të Lartësuar dhe u shmangen fakteve të qarta, madje edhe Krijuesi dhe Furnizuesi i tyre thotë: "A mendon ti se shumica e tyre dëgjojnë dhe kuptojnë? Ata nuk janë tjetër, veçse si bagëti. Madje, ata janë edhe më të shmangur nga rruga e drejtë." (Furkan, 44)
Shiko grupe shoqërish se si hedhin shpifje dhe se si qesëndisin njëra-tjetrën me nofka të këqija. Tolerantët në ndjekjen e Sunetit, çdo mbajtës të mjekrës, fetar, të përkushtuar e shohin si radikal, ekstremist, të vrazhdë e të ashpër, ndërsa rigorozët i shohin tolerantët në zbatimin e Sunetit nga muslimanët si të pafe, të shthurur, të huaj dhe mercenarë.

Duhet të bashkohemi rreth Islamit, ta ndërtojmë vendin, t'i ndërtojmë virtytet, të prodhojmë, të krijojmë, të shpikim e të zbulojmë, kurse ne i harxhojmë përpjekjet tona në grindje, zënka e urrejtje ndërsa e kemi harruar tolerancën dhe pajtimin. Allahu i Lartësuar thotë: "Në të vërtetë, besimtarët janë vëllezër" (Huxhurat, 10) Gjithashtu thotë: "Të gjithë mbahuni fort për litarin e Allahut (Kuranin) dhe mos u përçani!" (Ali Imran, 103)

Shiko në hartë prej Tanxherit (qytet në veri të Marokut) e deri te Xhakarta sheh vetëm kryengritje, rrëmujë, grusht shtete, të vrarë, të gjymtë, gjak në Palestinë, Irak, Afganistan, Pakistan, Somali, madje shumica e operacioneve vetëvrasëse, sulmet, uria, partitë, grupet, fraksionet gjenden në vendet islame, për shkak se shumica kur janë të padijshëm për fenë e tyre të drejtë dhe e braktisin kapjen për litarin e Allahut (Kuranin), atëherë i ndjekin shejtanët dhe epshin e tyre. Nëse nuk është kështu, më thoni për hir të Allahut, gjyshërit tanë a nuk krijuan civilizimin më të shkëlqyer që ka njohur njerëzimi, ofruan mesazhin më të bukur që mund të e pranojë njerëzimi? Vetëm atëherë kur u kapën për litarin e Allahut dhe pasuan të Dërguarin e Tij, lavdërimi dhe paqja e Allahut qoftë mbi të.

O njerëz, mëshironi njerëzit, merruni me pastrimin dhe dëlirjen e vetes, brendisë dhe zemrave tuaja dhe ejani t'ia rikthejmë Islamit krenarinë dhe t'i ofrojmë botës mesazhin e drejtë, mesatar, civilizues ashtu siç i ka hije fesë sonë madhështore.

 

Aid el Karni
Përshtati: Almedin Ejupi
4.10.2009