Falënderimet dhe lavdërimet i takojnë vetëm Allahut xhele shanuhu. Salavatet qofshin mbi të Dërguarin e Tij, Muhamedin salallahu alejhi ue selem, mbi familjen e tij, mbi shokët e tij dhe mbi të gjithë muslimanët që ndjekin rrugën e tij deri në Ditën e Gjykimit.

Selami është përshëndetje e muslimanëve dhe mirësi ndaj njëri-tjetrit. Allahu i Lartësuar e ka ndaluar që një person të hyjë në shtëpinë e dikujt pa marrë leje dhe se gjithashtu ai njeri duhet të japë selam. Allahu i Lartësuar thotë: “O ju që besuat, mos hyni në shtëpi të huaja pa kërkuar leje dhe pa përshëndetur njerëzit e saj. Kjo është më mirë për ju, në mënyrë që të merrni mësim.” (En-Nur, 27)
Si dhe: “Kur të hyni në ndonjë shtëpi, përshëndetni (ata që janë në to) me një përshëndetje të caktuar nga Allahu (me selamun alejkum), që është e bekuar dhe e këndshme.” (En-Nur, 61)

Nuk ka gjë më të mirë në Islam sesa përhapja e selamit. Transmeton Abdullah ibn Amr ibn Asi, Allahu qoftë i kënaqur me të, se një njeri e ka pyetur të Dërguarin salallahu alejhi ue selem se cila është gjëja më e mirë në Islam. Ai, paqja dhe bekimi i Allahut qoftë mbi të, tha: “T’i ushqesh dhe t’i japësh selam secilit person që e njeh apo nuk e njeh.” Buhariu 6236 dhe Muslimi 5194.
Amër ibn Azibi, Allahu qoftë i kënaqur me të, thotë: “Na ka urdhëruar i Dërguari salallahu alejhi ue selem me shtatë gjëra: Ta vizitojmë të sëmurin, ta përcjellim të vdekurin, t’i themi “JerhamukAllah” atij që teshtin, ta ndihmojmë të dobëtin, ta ndihmojmë atë të cilit i është bërë zullum (e padrejtë), ta përhapim selamin dhe t’i besojmë atij që betohet.” Buhariu 1239 dhe Muslimi 2066.

Gjithashtu, i Dërguari salallahu alejhi ue selem na tregon se përhapja e selamit është shkak për shtimin e dashurisë për besimtarët. Transmeton Ebu Hurejra, Allahu qoftë i kënaqur me të, se i Dërguari salallahu alejhi ue selem ka thënë: “Nuk do të hyni në xhenet derisa të besoni dhe nuk keni besuar derisa ta doni njëri-tjetrin. A dëshironi t’ju tregoj për një gjë, të cilën, nëse e bëni, do t’ua shtojë dashurinë? Përhapeni selamin mes jush.” Muslimi 2688.

Si jepet selam?

I Dërguari salallahu alejhi ue selem na ka treguar se si duhet dhënë selam. Imran ibn Husejni thotë: “Ka ardhur një njeri tek i Dërguari salallahu alejhi ue selem dhe i tha: “Es-selamu alejkum!” I Dërguari salallahu alejhi ue selem ia ktheu selamin dhe pastaj ai u ul. I Dërguari salallahu alejhi ue selem tha: “Dhjetë (d.m.th. iu shkruan atij dhjetë sevape).” Pastaj erdhi një njeri tjetër dhe tha: “Es-selamu alejkum ue rrahmetullah!” I Dërguari salallahu alejhi ue selem ia ktheu selamin dhe ai u ul. I Dërguari salallahu alejhi ue selem tha: “Njëzet (d.m.th. iu shkruan atij njëzet sevape).” Pastaj erdhi një njeri tjetër dhe tha: “Es-selamu alejkum ue rrahmetullahi ue berekatuhu!” I Dërguari salallahu alejhi ue selem ia ktheu selamin dhe ai u ul. I Dërguari salallahu alejhi ue selem tha: “Tridhjetë (d.m.th. iu shkruan atij tridhjetë sevape).” Ebu Davudi 5195 dhe Tirmidhiu 2689 dhe ka thënë: “Hadithi është hasen-sahih”.

Nga ky hadith kuptojmë se selami mund të jepet në shumë forma:
1. të thuash “Es-selamu alejkum” (ke vetëm dhjetë sevape);
2. të thuash “Es-selamu alejkum ue rrahmetullah” (dhe ke njëzet sevape);
3. te thuash “Es-selamu alejkum ue rrahmetullahi ue berekatuhu” (dhe ke tridhjetë sevape), që është edhe më e mirë dhe më e preferuar.

 

Përktheu dhe përshtati: Eroll Nesimi
1.8.2008