Falënderimet dhe lavdërimet i takojnë vetëm Allahut xhele shanuhu. Salavatet qofshin mbi të Dërguarin e Tij Muhamedin salallahu alejhi ue selem, mbi familjen e tij, mbi shokët e tij dhe mbi të gjithë muslimanët që ndjekin rrugën e tij deri në Ditën e Gjykimit.
Jemi duke sqaruar disa prej veprave që e shtojnë dashurinë e Allahut për robin e Tij. Ndër këto vepra janë edhe:

4. Ta duam Allahun e Lartësuar më shumë se çdo gjë tjetër, edhe më shumë se veten tonë, duke iu nënshtruar urdhrave të Tij dhe duke u larguar nga ndalesat e Tij, edhe nëse kjo bie ndesh me epshet dhe kënaqësitë tona. Allahu i Madhëruar thotë: “Thuaj (o i Dërguar): “Në qoftë se baballarët tuaj, djemtë tuaj, vëllezërit tuaj, bashkëshortet tuaja, farefisi juaj, pasuria që e fituat, tregtia që frikësoheni se do të dështojë, vendbanimet me të cilat jeni të kënaqur, (të gjitha këto) janë më të dashura për ju se Allahu, se i Dërguari i Tij dhe se lufta për në rrugën e Tij, atëherë pritni derisa Allahu nuk vë në rrugën e drejtë njerëzit e prishur.” (Et-Teube, 24)

Pra, patjetër duhet t’i japim përparësi asaj vepre me të cilën është i kënaqur Allahu i Lartësuar, edhe nëse kjo është në kundërshtim me epshin apo kënaqësitë e njeriut. Muslimani duhet të dojë atë që do Allahu i Lartësuar dhe të urrejë atë që e urren Ai, të armiqësohet për hir të Allahut dhe të dashurojë për hir të Allahut.
Transmeton Enes ibn Maliku, se i Dërguari salallahu alejhi ue selem ka thënë: “Asnjëri prej jush nuk ka besuar derisa të jem më i dashur tek ai sesa babai i tij, fëmija i tij dhe se gjithë njerëzimi.” Buhariu nr. 15 dhe Muslimi nr. 44.

5. Vetmimi në orët e vona të natës kur Allahu i Lartësuar zbret në qiellin e tokës, duke e adhuruar Atë me namaz dhe lexim Kurani dhe duke e përfunduar natën duke kërkuar prej Allahut të Madhëruar falje të mëkateve dhe mëshirë.
Allahu i Madhëruar thotë: “Ata qenë të cilët pak flinin natën. Dhe në syfyr (kah mbarimi i natës) ata kërkonin falje për mëkatet.” (Edh-Dharijat, 17-18)
Ebu Hurejra transmeton se i Dërguari salallahu alejhi ue selem ka thënë: “Zoti ynë i Lartmadhërishëm zbret çdo natë në qiellin e tokës, nga fundi i një të tretës së natës, dhe thotë: “Kush më lutet Mua t’i përgjigjem lutjes së tij? Kush kërkon diçka prej Meje t’ia dhuroj atë që kërkon? Kush kërkon prej Meje t’ia fal atij mëkatet?” Buhariu nr. 1145 dhe Muslimi nr. 758.

Së fundi, e lusim Allahun e Lartësuar të na bëjë prej atyre të cilët Ai i do dhe bëjnë vepra me të cilat Ai është i kënaqur!
 

Përktheu dhe përshtati: Eroll Nesimi
20.6.2008