Falënderimet dhe lavdërimet i takojnë vetëm Allahut xhele shanuhu, salavatet qofshin mbi të Dërguarin e Tij, Muhamedin salallahu alejhi ue selem, mbi familjen e tij, mbi shokët e tij dhe mbi të gjithë muslimanët që ndjekin rrugën e tij deri në Ditën e Gjykimit.
Me të vërtetë respektimi i prindërve është një gjë shumë me rëndësi. Allahu xhele shanuhu e ka krahasuar respektimin dhe dëgjimin e prindërve me dëgjimin dhe respektimin e Tij.

1. Allahu xhele shanuhu thotë: "Zoti yt ka dhënë urdhër të prerë, që të mos adhuroni tjetër pos Tij, që të silleni në mënyrë bamirëse ndaj prindërve." (El Isra, 23)
Allahu xhele shanuhu në këtë ajet e ka krahasuar mosrespektimin e prindërve me shirkun. Gjithashtu, Allahu xhele shanuhu thotë: “Ne njeriun e kemi urdhëruar për (sjellje të mira ndaj) prindit të vet." (Llukman, 14)

2. Allahu xhele shanuhu na ka urdhëruar që të sillemi mirë me ta dhe t’i respektojmë edhe nëse janë qafirë (jobesimtarë). Ai thotë: "E nëse ata të dy tentojnë që ti të më përshkruash Mua shok, për çka ti nuk ke kurrfarë fakti, atëherë mos i respekto ata, po në çështjet e jetës së kësaj bote të kesh mirëkuptim ndaj tyre..." (Llukman, 15)
Transmeton Muslimi nga Esma, e bija e Ebu Bekrit, se ka thënë: "Erdhi tek unë nëna ime e cila në atë kohë ishte mushrike (idhujtare), dhe e pyeta Pejgamberin salallahu alejhi ue selem duke i thënë: “O i Dërguar i Allahut, më ka ardhur nëna, e cila e urren gjendjen në të cilën jam (në Islam). Pra, a ta vizitoj nënën time?” Pejgamberi salallahu alejhi ue selem i tha: "Po, vizitoje nënën tënde." (Muslimi dhe Buhariu)

3. Respektimi i prindërve konsiderohet xhihad
Transmeton Abdullah ibn Amri, Allahu qoftë i kënaqur me të, i cili ka thënë: "Ka ardhur një person tek i Dërguari i Allahut salallahu alejhi ue selem dhe ka kërkuar leje nga Pejgamberi salallahu alejhi ue selem që të marrë pjesë në xhihad. Pejgamberi salallahu alejhi ue selem e pyeti: “A i ke të gjallë prindërit?” Ai iu përgjigj: “Po.” Pejgamberi salallahu alejhi ue selem i tha: “Xhihadi yt është tek ata.” (Buhariu dhe Muslimi)
Gjithashtu, transmetohet nga Enesi, Allahu qoftë i kënaqur me të, se ka thënë: "Ka ardhur një person te Pejgamberi salallahu alejhi ue selem dhe i tha: “Me të vërtetë unë kam dëshirë për të luftuar (për xhihad), mirëpo nuk po kam mundësi.” Pejgamberi salallahu alejhi ue selem i tha: “A e ke ndonjërin prej prindërve gjallë?” Ai tha: “Po, nënën time.” Pejgamberi salallahu alejhi ue selem iu përgjigj: “Ndreqi marrëdhëniet me Allahun (xhele shanuhu) duke i respektuar prindërit. Nëse e bën një gjë të tillë (nëse i respekton prindërit), atëherë ti ke bërë haxhin, umren dhe xhihadin." (Taberaniu. Mundhiri ka thënë se zinxhiri i këtij hadithi është i mirë]
Në disa hadithe Pejgamberi salallahu alejhi ue selem i ka dhënë përparësi respektimit të prindërve ndaj xhihadit. Transmetohet se Abdullah ibn Mesudi, Allahu qoftë i kënaqur me të, ka thënë: "E kam pyetur Pejgamberin salallahu alejhi ue selem se cila vepër është më e mira. Pejgamberi salallahu alejhi ue selem u përgjigj: “Falja e namazit në kohën e vet.” I thashë: “Pastaj cila?” Tha: “Respektimi i prindërve.” I thashë: “Pastaj cila?” Tha: “Xhihadi në rrugën e Allahut.” (Buhariu dhe Muslimi)

4. Respektimi i prindërve është shkak për të hyrë në xhenet
Transmeton Ebu Darda, Allahu qoftë i kënaqur me të, se e ka dëgjuar Pejgamberin salallahu alejhi ue selem duke thënë: "Prindërit janë dera e mesme e xhenetit. Pra, nëse dëshiron, humbe atë derë ose fitoje atë." (Tirmidhiu, i cili ka thënë se hadithi është sahih)
Kushejri ka thënë: "'...dera e mesme e xhenetit' ka për qëllim derën më të mirë të xhenetit."
Transmetohet nga Muavi ibn Xhahime, se Xhahime ka ardhur tek Pejgamberi salallahu alejhi ue selem dhe e ka pyetur: "O i Dërguar i Allahut, unë kam dëshirë që të luftoj në rrugën e Allahut dhe kam ardhur te ti që të konsultohem." Pejgamberi salallahu alejhi ue selem i tha: "A e ke gjallë nënën?" Tha: "Po." Pejgamberi salallahu alejhi ue selem i tha: "Kryej nevojat e nënës tënde, se me të vërtetë xheneti është tek këmbët e saj."
(Ahmedi, shejh Albani ka thënë se ky hadith është hasen)
Në transmetimin e Taberaniut qëndron se Pejgamberi salallahu alejhi ue selem e ka pyetur: "A i ke prindërit gjallë?" I thashë: "Po," Tha Pejgamberi salallahu alejhi ue selem: "Kryej nevojat e tyre, se me të vërtetë xheneti është nën këmbët e tyre." (Albani ka thënë se ky hadith është sahih)

5. Kënaqësia e Allahut është në kënaqësinë e prindërve
Transmeton Abdullah ibn Amri, Allahu qoftë i kënaqur me të, se Pejgamberi salallahu alejhi ue selem ka thënë: "Kënaqësia e Allahut është në kënaqësinë e prindërve dhe pakënaqësia e Allahut është në pakënaqësinë e prindërve."
(Tirmidhiu, këtë hadith e kanë bërë sahih Ibn Habbani, Hakimi dhe Albani)

6. Respektimi i prindërve është shkak për faljen e mëkateve
Transmeton Ibn Omeri, Allahu qoftë i kënaqur me të, se një njeri ka ardhur tek Pejgamberi salallahu alejhi ue selem dhe i tha: “O i Dërguar i Allahut, unë kam bërë një mëkat të madh, a ka pendim për mua?" Pejgamberi salallahu alejhi ue selem) i tha: "A ke nënë?" Ai i tha: "Jo." Pejgamberi salallahu alejhi ue selem i tha: "A ke teze?" Iu përgjigj: "Po." Pejgamberi salallahu alejhi ue selem i tha: "Pra, respektoje (dëgjoje) atë." (Tirmidhiu, dhe ka thënë se hadithi është sahih)
Pra, kjo tregon se respektimi i prindërve është shkak për shlyerjen e mëkateve, pasi Pejgamberi salallahu alejhi ue selem iu përgjigj këtij mëkatari duke e pyetur se a ka nënë, që ta respektonte dhe dëgjonte atë, që t’i shlyhen mëkatet me respektimin e saj. Gjithashtu, transmeton Malik ibn Amri se Pejgamberi salallahu alejhi ue selem ka thënë: "Ai i cili e liron një rob musliman, do të jetë shkaktar për shpëtimin e tij nga zjarri, kurse ai i cili e ka njërin prej prindërve të gjallë dhe ata nuk ia falin atij (nuk ia bëjnë hallall), Allahu xhele shanuhu do ta largojë atë shumë larg." (Ahmedi, hadithi është hasen)

7. Respektimi i prindërve është edhe shkak për largimin e ndonjë fatkeqësie
Argument për këtë është ngjarja e tre njerëzve që kanë hyrë në shpellë dhe një gur i madh ka rënë dhe ua ka mbyllur daljen. Në këtë gjendje, secili prej tyre e ka lutur Allahun xhele shanuhu me ndonjë punë që kishte bërë për hir të Tij dhe njëri prej tyre e ka lutur Allahun xhele shanuhu me respektimin e prindërve, duke thënë: "O Allah, nëse këtë vepër e kam bërë për hir Tëndin, na e largo këtë shkëmb, që të mund të dalim." Dhe Allahu xhele shanuhu ua largoi shkëmbin dhe dolën prej shpelle. (Buhariu dhe Muslimi)

8. Transmeton Ebu Hurejra, Allahu qoftë i kënaqur me të, se Pejgamberi salallahu alejhi ue selem ka thënë: "Nuk ka mundësi fëmija t'ia kthejë hakun prindit të tij, përveç nëse e sheh prindin e tij se është zënë rob, pastaj e blen atë dhe e liron." (Muslimi)

9. Mosrespektimi i prindërve është nga mëkatet më të mëdha
Transmeton Ebi Bekre, Allahu qoftë i kënaqur me të, se Pejgamberi salallahu alejhi ue selem ka thënë: "A dëshironi t'ju tregoj për mëkatet më të mëdha?" Këtë e përsëriti tri herë. Ne i thamë: "Po, o i Dërguar i Allahut." Pejgamberi salallahu alejhi ue selem tha: "Bërja shirk (shok) Allahut dhe mosrespektimi i prindërve…" (Buhariu dhe Muslimi)

O vëlla i dashur, pasi e kuptove rëndësinë e respektimit të prindërve dhe dënimin e atij që nuk i respekton prindërit, shpejto dhe respektoji ata, dëgjoji ata (përveç nëse të urdhërojnë në mëkate), mos u thuaj atyre as uf, lute Allahun që t'i mëshirojë ata. Allahu xhele shanuhu thotë: "Dhe në shenjë mëshire shtrije pranë tyre krahun përulës e respektues dhe thuaj: “Zoti im! Mëshiroji ata të dy, sikurse më edukuan mua kur isha i vogël." (El Isra, 24)
Allahu na bëftë prej atyre që i respektojnë prindërit dhe i dëgjojnë ata! Allahu i mëshiroftë prindërit tanë ashtu siç na mëshiruan sa ishim të vegjël! Allahu ua faltë mëkatet prindërve tanë dhe i shpërbleftë ata me xhenetin Firdeus!
 

Përgatiti: Eroll Nesimi
18.1.2008