Falënderimet dhe lavdërimet i takojnë vetëm Allahut të Lartësuar. Atë e falënderojmë dhe vetëm prej Tij ndihmë dhe falje kërkojmë. Kërkojmë mbrojtje prej Allahut nga veprat tona të liga dhe nga të këqijat e epsheve tona. Nuk ka dyshim se atë që e udhëzon Allahu, nuk ka kush që mund ta shpjerë në humbje dhe atë që e humb Allahu, nuk ka kush që mund ta udhëzojë.
Dëshmoj se nuk ka Zot tjetër, i cili e meriton adhurimin, përveç Allahut, i Cili është i vetëm dhe pa shok dhe dëshmoj se Muhamedi salallahu alejhi ue selem është rob dhe i Dërguar i Tij. Allahu i Madhëruar ka thënë: “A menduan njerëzit të thonë: Ne kemi besuar, e të mos vihen në sprovë? Ne i sprovuam ata që ishin para tyre, ashtu që Allahu gjithqysh do t’i dallojë ata që e thanë të vërtetën e do t’i dallojë edhe gënjeshtarët.” (El Ankebut, 2-3)

Kuptimi i këtij ajeti është se Allahu i Lartësuar nuk do t’i lërë besimtarët pa i sprovuar. Ata do të sprovohen në pasurinë e tyre, veten e tyre, familjen e tyre, në mënyrë që të duket besimi i tyre.

Dhe prej sprovave me të cilat Allahu i Lartësuar i ka sprovuar besimtarët është edhe sprova e “vetmisë”, ku një besimtar gjithmonë e ndien veten e tij në mesin e njerëzve si të vetmuar, të shmangur, të dëbuar nga vëllezërit e tij, nga familja e tij apo rrethi ku jeton dhe ku është rritur. E gjithë kjo është për shkak se besimtari i thërret ata në të mirat e kësaj bote dhe të botës tjetër, kurse ata dëshirojnë kënaqësitë e kësaj bote dhe nuk u intereson bota tjetër, sikur ta kenë garantuar jetën e tyre. Por ata nuk e dinë se pas të mirave të kësaj bote, do t’i presë një e keqe: dënimi në Ditën e Gjykimit.

Ibnu Atije, Allahu e mëshiroftë, ka thënë: “Sprova prej Allahut është e vazhdueshme. Të vetmuarit (guraba) është një sprovë e cila është përsëritur me shekuj më parë dhe vazhdon të përsëritet. Kjo sprovë ka goditur edhe të Dërguarin salallahu alejhi ue selem dhe shokët e tij, pasi ai filloi të ftonte njerëzit në akiden e pastër dhe që t’i largohen adhurimit të idhujve. Ky moment ka qenë momenti i parë kur Muhamedi salallahu alejhi ue selem dhe shokët e tij e kanë ndier veten të vetmuar, të vetmuar në familjet e tyre,në fiset e tyre, duke e fshehur Islamin e tyre, derisa i ndihmoi Allahu i Lartësuar dhe fenë e Tij dhe e ngriti mbi të gjitha fetë.

Kjo është edhe gjendja jonë tani, kur njeriu i cili i thërret njerëzit në rrugën e drejtë etiketohet me emra të ndryshëm për shkak se po i kundërshton traditat e njerëzve ku jeton dhe po i shqetëson ata në haramet që janë duke bërë. Dhe për këtë shkak e quajnë atë të prapambetur, ekstrem etj.

E gjithë kjo vërteton fjalën e të Dërguarit salallahu alejhi ue selem, i cili thotë: “Ka filluar Islami i vetmuar dhe do të kthehet i vetmuar siç ka qenë.” Ahmedi 3/71, Ibn Xherir 13/149, Ibn Hiban 2625.

Tani, pasi muslimani e ka parë gjendjen e tij, a i lejohet atij të rrijë me duar në faqe dhe të thotë se “ky është caktimi i Allahut dhe unë nuk mund të bëj asgjë”?!
Themi: Jo! Muslimani duhet të shohë hadithin e të Dërguarit salallahu alejhi ue selem dhe do të shoh përgëzimin e të Dërguarit salallahu alejhi ue selem, të cilin ai ua ka bërë të vetmuarve (gurabave). Ky përgëzim është xheneti (siç do të tregohet më vonë) dhe do t’i takojë atij që duron sprovën në rrugën e Allahut.
Duke pasur parasysh nevojën e kësaj teme, do të shkruajmë disa fjalë për cilësitë e të vetmuarve.

Cilësitë e të vetmuarve prej besimtarëve dhe në çfarë gjendje janë ata

1. Transmeton Abdullah ibn Mesudi, Allahu qoftë i kënaqur me të, se i Dërguari salallahu alejhi ue selem ka thënë: “Me të vërtetë Islami ka filluar i vetmuar dhe do të kthehet i vetmuar siç ka qenë dhe “Tuba” u takon gurabave.” E pyetën të Dërguarin salallahu alejhi ue selem: “Kush janë ata, o i Dërguar i Allahut?” Ai tha: “Ata janë ata të cilët ndreqin kur njerëzit prishen (nga mëkatet apo zhyten në harame).” Ahmedi 3/71, Ibn Xherir 13/149, Ibn Hiban 2625.

Ibnul Ethiri ka thënë: “Tuba” e përmendur në hadith është emër i xhenetit, kurse disa kanë thënë se është emër i një peme në xhenet (Enihaje 3/141).

Kurse Ibn Kethiri në tefsirin e ajetit ku Allahu i Lartësuar thotë: “Ata që besojnë dhe punojnë drejtësi, për ta është Tuuba dhe vendi më i bukur për t’u kthyer më në fund.” (Er-Ra’d 29), ka thënë: “Është transmetuar nga disa sahabë dhe tabiinë se Tuba është emër i një peme në xhenet.” (2/512)

2. Transmeton Ebu Hurejra, Allahu qoftë i kënaqur me të, se i Dërguari salallahu alejhi ue selem ka thënë: “Me të vërtetë Islami ka filluar i vetmuar dhe do të kthehet i vetmuar siç ka qenë dhe “Tuba” u takon gurabave.” (Muslimi 1/130)

 

Vazhdon (inshallah)
Përktheu: Eroll Nesimi
14.12.2008