Çështja e parë: - Ndërrimi i fjalëve të cilat kanë ardhur në lutjet e përcjella nga i Dërguari, lavdërimi dhe paqja qofshin mbi të.

Nga këto dy transmetime kuptojmë se nuk bën të ndryshohen fjalët e përmendura në lutjet profetike me fjalë të tjera, edhe pse ato fjalë mund të aludojnë në të njëjtën domethënie.

Kjo është kështu nëse lutjet i bëjmë në gjuhën arabe dhe kështu duhet të bëhen parimisht lutjet në përgjithësi. Nuk do të duhej të kalonte besimtari në thënien e lutjeve të transmetuara nga Muhamedi, lavdërimi dhe paqja qofshin mbi të, në gjuhën shqipe, vetëm se atëherë kur nuk mund t'i mësojë ato në arabisht. Prandaj ju këshillojmë t'i përmbaheni kësaj dhe t'i thoni ato lutje ashtu si janë të shkruara në gjuhën arabe. Nëse nuk i keni mësuar përmendësh, atëherë mund t'i lexoni nga libri, pasi nuk është kusht t'i thoni përmendësh dhe ju ndërkohë do ta keni mundësin ta lexoni e ta mësoni edhe domethënien atyre lutjeve.

Ndërsa nëse i thoni ato lutje në shqip, atëherë do të ishte më e drejtë që t'i përmbaheni përkthimit ashtu si është bërë pa ndryshuar vetat apo diçka tjetër, ashtu si ju e bëni në lutjen për të cilën bëni pyetje.

Çështja e dytë: Ekziston dallim në mes të lutjeve të mbrëmjes dhe lutjeve para fjetjes.

Në lidhje me lutjen konkrete për të cilën ju pyesni, fillimisht themi se kjo është një lutje që i Dërguari, lavdërimi dhe paqja qoftë mbi të, e ka thënë në këtë formë:

“Redijtu bil-lahi Rabben ue bil-Islami di­nen, ue bi Muhammedin, salallahu alejhi ve selem, nebijjen”.

“Jam i kënaqur që Zoti im është Allahu, feja ime është Islami dhe Pejgamberi im është Muh­mmedi, lavdërimi dhe paqja qofshin mbi të.”

Prandaj ju do të duhej t'i përmbaheni thënies së saj ashtu si është përcjellë, pa ndryshuar gjë. Në pyetjen tuaj, në vend të fjalës: “Jam i kënaqur”, ju thoni: “Gëzohem”. Ne u kthyem në përkthimin që është përdorur në librin: “Mburoja e Muslimanit” dhe aty gjendet fjala të cilën e kemi përdorur ne: “Jam i kënaqur”, prandaj më e drejtë do ishte kjo. Është e mundur që dikush ta përkthejë ashtu si ju e keni përcjellë, por më e saktë është shprehja që kemi përdorur ne.

Pastaj ju themi se kjo lutje është një nga lutjet të cilat i Dërguari salallahu alejhi ve selem e thoshte gjatë mëngjesit e mbrëmjes dhe jo para fjetjes.

Në përgjithësi lutjet të cilat përmenden në librin “Mburoja e Muslimanit”, nën titullin: ”27-DHIKRI I MËNGJESIT DHE I MBRËMJES”, faqe: 85, janë lutje të cilat bëhen prej pas daljes së agimit, më saktë pas namazit të sabahut, deri në lindje të diellit ose deri  pas kohës së duhasë dhe koha e thënies së tyre në mbrëmje është  pas ikindisë deri në perëndim të diellit ose deri në namaz të jacisë. Me fjalë të tjera, këto lutje nuk janë lutje të gjumit, sepse lutjet para fjetjes janë të tjera dhe ato janë të përmendura menjëherë pas lutjeve të mëngjesit dhe të mbrëmjes, nën titullin: “28-DHIKRI PARA FJETJES”. Lutjet të cilat i përmendet nën këtë titull janë lutjet para fjetjes.

Allahu e di më së miri!
 

Alaudin Abazi
4.10.2009