Pyetja:

Selam alejkum!
Para 2 muajsh ndërroi jetë kushëriri im. Ai ka lindur në ditën e shenjtë të Bajramit po ashtu edhe emri i tij ishte Bajram, edhe varrimi i tij ishte në ditën e shenjtë të Fitër Bajramit. Çfarë ndodh me atë njeri si ai?
Allahu ju shpërbleftë!


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Vëlla i nderuar, lindja dhe vdekja e njeriut në ditë të caktuara të vitit nuk ndërlidhet me vlerën e personalitetin që ka personi në fjalë, qoftë për të mirë.
Për ta kuptuar më qartë këtë që thamë, do të sjellim shembullin që ka ngjarë në kohën e të Dërguarit, lavdërimi dhe paqja qofshin mbi të.

Imam Muslimi dhe të tjerët përcjellin se kur të Dërguarit, lavdërimi dhe paqja qofshin mbi të, i vdiq djali, atë ditë ka ndodhur edhe zënia e Diellit. Njerëzit menduan se zënia e diellit ka ngjarë si shkak i vdekjes së djalit të Muhamedit, lavdërimi dhe paqja qofshin mbi të dhe pasi ishte ditë pikëllimi për të, atëherë njerëzit thanë se si shenjë pikëllimi ndodhi edhe zënia e diellit. Kur mori vesh Muhamedi, lavdërimi dhe paqja qofshin mbi të, se çfarë mendojnë njerëzit, u ngjit në hydbe dhe mbajti një fjalim ku ndër të tjera tha: “Vërtet Dielli dhe Hëna janë argumente të Allahut që nuk zihen me vdekjen apo me lindjen e dikujt, por nëse ndodh kjo atëherë shpejtoni në përkujtimin e Allahut (pra faleni namazin e zënies së diellit)”. Dhe me këtë largoi paragjykimet e njerëzve të cilët mendonin se kjo vdekje kishte lidhje me zënien e diellit.

Prandaj vlera dhe shpërblimi i njeriut do të jetë varësisht se si ka qenë ai me respektimin e urdhrave të Allahut dhe largimin nga haramet e tij. Nëse në këtë ai ka qenë si duhet atëherë i tilli është i shpëtuar, pa marrë parasysh se si ka ndodhur vdekja e tij. Allahu e di më së miri!