Pyetja:

Selam alejkum! Kam një problem i cili më shqetëson prej vitesh dhe deri më sot nuk po gjej zgjidhje dhe jam mërzitur tej mase. Aktualisht jam 27 vjeç dhe jetoj në Tiranë. Që në moshën 17 vjeç kam shkuar në emigracion për një jetë më të mirë ku kalova rreth 8 vjet në shtete të ndryshme. Para pesë vitesh kur jetoja akoma në emigracion u sëmura shumë keq. Doktorët nga analizat që më bënë nuk konstatuan ndonjë lloj sëmundje që të jepte simptomat që kisha dhe të gjithë mendonin se ishin probleme nervore. Simptomat ishin dhimbje koke dhe mpirje qafe, dhimbje të fortë të syve, mospërqendrim, dhimbje gjunjësh, neveri nga ushqimi, mungesë oreksi etj. Këto dhimbje i kam pasur aq të forta se nuk mundja të qëndroja dot me këmbë dhe as shtrirë. Duke e parë situatën kështu u detyrova të kthehesha në Shqipëri që të isha pranë familjes, pas disa vizitash në doktorë të ndryshëm doktorët arritën në konkluzion që këto ishin probleme nervore dhe më dhanë disa ilaçe që i përdora për tre muaj. Pasi e ndjeva veten më mirë u nisa prapë për në emigrim se kisha lënë punën, por pas disa muajsh punë fillova të kisha shqetësime të njëjta. U mundova të duroja dhe i jepja vetes kurajë, por nuk i përballoja dot. U detyrova u ktheva prapë në Shqipëri, ku prapë mjekët më kuruan me ilaçe antidepresive.

Problemi qëndron që prej atëherë unë nuk kam shëndet, nuk më ecën shëndeti. Jam pothuajse gjithë vitin i sëmurë. Dhe kohët e fundit problemet i kam më shumë psikologjike. Shpesh më duket sikur ka një forcë që më shtyn të bëj vepra të cilat unë nuk i kam në karakter dhe as i mendoja më parë. Më ka ikur vullneti për punë, por dhe sapo gjej një pune apo kam shpresa se do filloj një pune diku, diçka ndodh dhe të gjitha anulohen. Sapo ëndërroj apo vendos të bëj diçka menjëherë bëhem pesimist dhe them që ajo gjë nuk bëhet. Kam dhimbje të çrregullta të trupit; si shtrëngim fyti, dhimbje stomaku, ndjesi të fikëti etj. Kam shkuar tek një imam këtu në Tiranë që të më këndonte. Ai më këndoi dhe nuk më tha gjë nëse kisha diçka apo jo dhe unë vazhdoj të kem të njëjtat shqetësime. Ju lutem kush ka mundësi të më japë një ide se çfarë të bëj apo ku të drejtohem, se me thënë të drejtën nuk mund të shtyhet jeta në këtë gjendje. Tek mjekët nuk kam dëshirë më të shkoj sepse kam pirë shumë ilaçe që më qetësojnë për momentin, por pas pak kohësh prapë të njëjtat gjëra. Prindërit e mi kanë shkuar nëpër hoxhallarë të ndryshëm, por nuk më kanë treguar se çfarë u kanë thënë. Para pak ditësh im atë ka shkuar te një hoxhë, i cili i tha që djali ka problem por do bëhet mirë. Nuk e di nëse hoxha shëronte me Kuran apo ishte fallxhor, se vetë nuk isha atje.

Ma bëni hallall që u zgjata kaq shumë. Ju lutem, nëse keni mundësi, më jepni një mendim çfarë mund të bëj. Allahu ju mëshiroftë!


Përgjigjja:

Alejkum selam ue rahmetullahi ue berekatuhu!

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.


Nga e gjithë kjo që na sqarove në pyetjen tënde, unë mendoj se ti je i sulmuar nga xhinët. Do të përmend më poshtë shkakun se pse shejtani e sulmon njeriun.
Xhinët e sulmojnë njeriun në dy forma:

1. Nëse urdhërohen prej magjistarit.

2. Mund ta sulmojnë njeriun vetvetiu, për disa shkaqe:

a. Hakmarrje: nëse p.sh njeriu e ka lënduar xhinin, mund të ndodhë që njeriu të hedhë ujë të nxehtë mbi thërrimet e bukës ku rrinë xhinët dhe ta djegë xhinin dhe në këtë rast ai hakmerret ndaj njeriut dhe e sulmon atë duke hyrë në trupin e tij.

b. E sulmon nëse dashurohet. Pejgamberi s.a.v.s ka thënë: "Kur të hyni në tualet thuani "Bismil-lah Allahumme inni eudhu bike minel hubthi uel habaith" dhe kur të thuash këtë lutje bëhet perde mes teje dhe shejtanit (nuk ka mundësi shejtani me të pa zhveshur)". Nëse njeriu nuk e thotë këtë dua, atëherë shejtanët mund ta shohin njeriun zhveshur dhe ka mundësi që shejtani mashkull të dashurohet me njeriun femër dhe të hyjë në trupin e saj, apo shejtani femër të dashurohet me njeriun mashkull dhe të hyjë në trupin e tij.

c. Mund ta sulmojë vetëm për t'i bërë zullum, pra shkaku është që t'i bëjë zullum njeriut.

Këto ishin disa shkaqe të cilat e shtyjnë shejtanin për të hyrë në trupin e njeriut.
Ty vëlla të këshilloj që të shkosh tek ndonjë hoxhë i cili bën rukje (shërim me Kuran) dhe në dashtë Allahu të shërohesh.