Pyetja:

Selam alejkum!
Përshëndetjet e mia për ju. Jam jetime nga babai, por tani ka pak kohë që i gjithë fisi i babait s’flasin me ne. Po shkojnë mirë dhe me ato që nuk kanë shkuar për inatin tonë. Po e vuajmë shumë këtë gjë. Ju lutem na këshilloni si të veprojmë. Allahu jua shpërbleftë!


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Vërtet e kemi parasysh vuajtjen dhe mërzinë me të cilin ballafaqoheni ju si familje, pasi vërtet është vështirë, posaçërisht në kohërat e sotme, t’u bëhet ballë problemeve të shumta me të cilat ndeshet familja kur nuk e ka kryefamiljarin, i cili do të kujdesej që këto peripeci të tejkaloheshin.

Fatkeqësisht, nuk janë të rralla edhe situatat kur familja e prindit të vdekur, në vend që të kujdeset për familjen e të afërmit të tyre, u bëjnë trysni të shumta atyre që të përfitojnë interesa materiale të ulëta nga kjo familje.

Në rastin tuaj do t`ju këshilloja pikësëpari që të bëni durim dhe të kuptoni se Ai që ua mori të dashurin tuaj nuk ju ka harruar dhe se Allahu nuk harron kurrë. Prandaj mos i ndalni lutjet dhe mundohuni gjithmonë ta keni parasysh se Allahu pas çdo vështirësie sjell lehtësimin.

Pastaj në lidhje me problemet me familjen e babait tuaj mundohuni t’i zgjidhni ato duke kërkuar ndihmën e njerëzve autoritativ në atë familje të gjerë dhe që njihen për drejtësi e sinqeritet. Mendojmë se nëse ata ndërmjetësojnë, atëherë ju mund t’i zgjidhni mospajtimet që keni.

Lus Allahun e Lartësuar që t`ju forcojë e t’i tejkaloni problemet me të cilat ballafaqoheni dhe t`ju shpërblejë me të mira në këtë botë dhe në botën tjetër. Amin!