Pyetja:

Eselamu alejkum redaksi e nderuar! Allahu ju shpërbleftë për punën tuaj. Pyetja ime qëndron kështu: djali im është shtatë vjeç e gjysmë, andaj edhe ka filluar t’i falë pesë kohët e namazit. Në fillim nuk kishte ndonjë problem që të zgjohej për namazin e sabahut, kështu që edhe në xhami ishte i pranishëm për çdo sabah. Mirëpo pasi jetojmë në Skandinavi dhe koha e sabahut vjen shumë herët, ndërsa ajo e jacisë vonë, ka filluar të ketë probleme me zgjimin, kështu që ndonjëherë fle pas akshamit, por qan shumë. Por edhe kur zgjohet për jaci qan, apo edhe nga lodhja as suret nuk i thotë. Vetëm desha të cek se prej kur ka lindur ka qenë i sëmurë dhe ka pasur probleme të jashtëzakonshme me pagjumësinë dhe ky është viti i parë që është shëruar elhamdulilah. Dëshiroj të di pasi ai ditën nuk dëshiron assesi të flejë, si t’ia bëjmë, namazin e sabahut a ta lë kur të zgjohet vetë që ta falë apo ta zgjoj?
 

Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Motër e nderuar, fillimisht duhet ta keni të qartë se Allahu i Lartësuar nuk e ka bërë obligim namazin për të miturit, por na rekomandoi që t’i edukojmë fëmijët që të falin namaz qysh prej moshës shtatëvjeçare dhe kur t’i mbushin të dhjetat, të përdorim nga pak shkopin vetëm e vetëm që të kaliten në faljen e namazit, pra jo se obligohet në këtë moshë. Argument për këtë që thashë është fjala e të Dërguarit tonë, paqja dhe shpëtimi i Allahut qoftë mbi të, i cili ka thënë: “Urdhëroni fëmijët tuaj të falen duke qenë ata shtatëvjeçarë dhe rrihini për namaz kur të mbushin të dhjetat.” E gjithë kjo bëhet që të kalitet fëmija me namaz jo se e ka obligim apo ka mëkat nëse e lë atë, pasi çdo obligim në fenë tonë lidhet direkt me moshën madhore. Pra, në rastin tuaj motër, në mënyrë që të mos mundohet fëmija dhe të mos e shndërrosh namazin diçka të urryer tek ai, pra le të falë namazin e akshamit dhe pas tij menjëherë edhe namazin e jacisë, pra le t’i bashkojë këto dy kohë të namazit dhe namazin e sabahut zgjoje ta falë pak para se të lindë dielli e jo në kohën kur falet në xhami, sepse fëmijës së mitur nuk i obligohet falja e namazit me xhemat e as ne xhami, kështu që besoj që do të jetë një lehtësim për të. Nga opsionet e volitshme keni edhe që ta detyroni fëmijën të flejë ditën, në mënyrë që të jetë më i relaksuar për namazin e sabahut.
Allahu e di më së miri!