Pyetja:

Selam alejkum! Në të gjithë librat që lexojmë rreth faljes së namazit dhe rreth abdestit tregohet se cilat gjëra e prishin abdestin. Në të gjitha rastet shkruhet se abdestin e prishin nevoja, gjumi etj. Cilat janë këto gjërat e tjera që e prishin abdestin? Se ne ndoshta me pavetëdije i bëjmë gjërat e tjera pa e ditur se po e prishim abdestin. Pra, përveç nevojës dhe gjumit, cilat janë ato gjërat e tjera që po e prishin abdestin? Allahu ju shpërbleftë!


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Abdestin e prishin këto gjëra:
1. Dalja e urinës, kryerja e nevojës së madhe dhe dalja e gazrave nga trupi.

2. Fjetja, të fikëtit, dehja ose raste të tjera të humbjes së vetëdijes.

3. Dalja e lëngut të bardhë (nga organi gjenital), i cili del para spermës (farës). Ky lëng dallon nga sperma, sepse del jo me vrull dhe me sasi shumë më të vogël. Ka shumë njerëz të cilët mendojnë se kjo është spermë dhe duhet të merret gusël (pastrim i tërë trupit) pas daljes së këtij lëngu. Ky lëng del shumë shpesh nga epshi, mirëpo ndodh që të dalë edhe gjatë kryerjes së nevojës së madhe apo të vogël (zakonisht në pubertet). Nëse një personi i del ky lëng, atëherë duhet ta lajë organin gjenital dhe të marrë abdest e nuk është i detyruar të marrë gusël. Argument për këtë është hadithi i Pejgamberit salallahu alejhi ue selem, që transmetohet nga Aliu, Allahu qoftë i kënaqur me të: “Kam qenë një person që më ka dalë shumë shpesh lëngu i bardhë (nga organi gjenital) dhe i kam thënë Mikdadit që ta pyesë Pejgamberin (salallahu alejhi ue selem) për këtë. Pejgamberi salallahu alejhi ue selem) i ka thënë: “Duhet të marrësh abdest.” Buhariu dhe Muslimi.

4. Prekja e organit gjenital me qëllim gjithashtu e prish abdestin, siç transmetohet nga Busretu bint Safuani, Allahu qoftë i kënaqur me të, se Pejgamberi salallahu alejhi ue selem ka thënë: “Kush e prek organin gjenital, le të marrë abdest.” Ebu Davudi, Tirmidhiu, Nesaiu, Ibn Maxhe, hadithi është sahih.

5. Ngrënia e mishit të devesë e prish abdestin. Transmetohet nga Xhabiri, Allahu qoftë i kënaqur me të, se një njeri e ka pyetur Pejgamberin salallahu alejhi ue selem:
“A duhet të marr abdest pas ngrënies së mishit të deleve?” Ka thënë Pejgamberi salallahu alejhi ue selem: “Nëse dëshiron.” Pastaj e ka pyetur Pejgamberin salallahu alejhi ue selem: “A duhet të marr abdest pas ngrënies së mishit të devesë?” Pejgamberi salallahu alejhi ue selem ka thënë: “Po.” (Muslimi)

6. Po ashtu edhe rideja (dalja nga feja islame) e prish abdesin; nëse ndokush bën shirk apo kufër, atëherë abdesti i tij prishet, pasi edhe besimi i tij është prishur.