Pyetja:

A preferohet të falemi me një ritëm normal, pak më shpejtë apo sa më ngadalë aq më mirë, sepse kur shkoj në xhami shumë shpejt po falen. Po thënia e tyre sunetet bën shpejt?


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Së pari: Në lidhje me faljen e namazeve farze në xhami:

Ekzistojnë një numër hadithesh të cilat urdhërojnë imamin që të mos i zgjasë namazet farze në xhami. Në një hadith, të cilin e shënon Buhariu dhe Muslimi, Muhamedi, lavdërimi dhe paqja qofshin mbi të, e qorton Muadh Ibën Xhebelin pse e kishte zgjatur namazin.
Megjithëkëtë këtu duhet ta kemi parasysh se kriteri për t’u konsideruar një namaz i zgjatur respektivisht i shkurtuar nuk është opinioni i xhematit që falet në atë xhami, por këtu shikohet në bazë të praktikës së Muhamedit, lavdërimi dhe paqja qofshin mbi të.

Ibën Haxheri gjatë komentimit të hadithit të sipërpërmendur thotë: “Kush pason traditën e të Dërguarit, lavdërimi dhe paqja qofshin mbi të, në shkurtim dhe plotësim (të namazit), nuk kemi të drejtë të ankohemi se ai e ka zgjatur (namazin). Mënyra e faljes së Muhamedit, lavdërimi dhe paqja qofshin mbi të, është e njohur për të gjithë. Prandaj urdhri i kërkuar për shkurtim (të namazit) është relativ, që duhet t’i referohet praktikës së të Dërguarit, lavdërimi dhe paqja qofshin mbi të, dhe në atë që ai urdhëronte dhe jo (të merret kriter) sipas shijes së falësve (xhematit)...”

Në hadithin e lartpërmendur, i Dërguari, lavdërimi dhe paqja qofshin mbi të, e urdhëron Muadhin që gjatë faljes së namazit me xhemat të mos këndojë suret e gjata të cilat janë disa faqe, por të këndoj suret si “Esh- Shems”, “El Ala”, “El-Lejl”, etj1. Këto sure përafërsisht arrijnë një faqe të Kuranit apo pak më shumë e pak më pak se një faqe. Prandaj nëse imami këndon përafërsisht kaq gjatë faljes, xhemati nuk ka të drejtë të ankohet se është duke e zgjatur namazin. Por nëse e zgjat më shumë, atëherë ata kanë të drejtë të ankohen.

Së dyti: Nëse muslimani falet vetëm

Në këtë rast ai është më i lirë që të falet varësisht prej rrethanave, kohës dhe disponimit të tij. Por këtu duhet ta kemi parasysh që gjatë faljes të mos neglizhojë farzet dhe vaxhibet e namazit, si për shembull të nxitojë gjatë rukusë, ngritjes nga rukuja, sexhdesë etj.

Gjithashtu neglizhimi gjatë faljes së farzeve është më i dëmshëm se gjatë suneteve, pasi farzet janë obligim për besimtarin dhe ato duhet të kryhen më së miri. Prandaj është e përhapur te të vjetrit shprehja se farzet nëse falen, duhet t’i falemi më me kujdes, se mos po lëmë diçka pa plotësuar e pastaj do të kemi mungesë tek Allahu i Lartësuar për obligimet me të cilat jemi ngarkuar. Ndërsa për sunetet ata theksojnë se ato janë diçka jashtë farzeve dhe nëse lëmë diçka pa plotësuar, atëherë
inshallah nuk kemi dënim.

Kjo është arsyeja e përhapjes së kësaj shprehjeje, por përkundër kësaj, në praktikën e të Dërguarit, lavdërimi dhe paqja qofshin mbi të, vërtetohet se ai gjatë suneteve, posaçërisht në namazet e natës, është falur më ngadalë se farzet. Kjo për faktin se ai namazin nuk e ka kryer si një barrë të cilën po e çon në vend me mundim, ashtu si është fatkeqësisht gjendja e shumë muslimanëve gjatë faljes, por e ka bërë këtë adhurim me kënaqësi, përkushtim dhe ëndje.

Prandaj, lusim Allahun e Lartësuar të na bëjë nga ata që e kanë kuptuar rëndësinë e namazit dhe së bashku me këtë e kanë kuptuar vlerën dhe dobinë që fiton besimtari gjatë kryerjes së këtij adhurimi. Nëse arrihet kjo, atëherë besimtari do ta gjejë veten shumë më të përkushtuar ndaj këtij adhurimi dhe do ta kryejë me kënaqësi.