Pyetja:

Selam alejkum! Kisha një pyetje në këtë mënyrë. Që prindi t'i tregojë vazhdimisht fëmijës mos vepro në këtë mënyrë (d.m.th. veprim të gabuar) se do të të ndodhë kjo gjë! A është e nëmur apo këshillë ndaj fëmijës?


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Synimi më i rëndësishëm për një prind ndaj fëmijës së tij do të duhej të ishte që ta mësojë atë në sinqeritet, çiltërsi dhe t'i largohet hipokrizisë dhe gënjeshtrës. Prandaj edhe mësimi, këshillimi dhe edukimi i fëmijës duhet të jetë mbi këtë frymë. Nëse prindi e këshillon fëmijën ose e qorton atë, duke e frikësuar me një të pavërtetë, ai në fillim do ta besojë atë gjë, por pas një kohe, kur ta kuptoj se kjo nuk ishte e saktë, atëherë ai, jo që nuk do të ketë mendim të mirë se është gënjyer, por do të mësoj edhe vetë të veprojë të njëjtën gjë.

Shpesh prindërit i gjykojnë gabim fëmijët e tyre, duke menduar se nëse ua sqarojnë drejt gjërat për të cilat ata pyesin, atëherë ata nuk do të kuptojnë. Fëmija duhet të mësohet dhe edukohet duke i sqaruar realitetet saktë, por vazhdimisht duke ua thjeshtësuar dhe u folur atyre me shembuj dhe gjëra që janë të kapshme për ta. Shembullin më të mirë kemi praktikën e të Dërguarit, lavdërimi dhe paqja qofshin mbi të. Shumë nga transmetimet të cilat i përcjell sahabi i nderuar Abdullah Ibën Abasi, se i Dërguari e ka porositur kështu apo ashtu, janë këshilla që Muhamedi salallahu alejhi ve selem ia dha atij kur ishte në moshën shumë të re. Historianët përcjellin se Muhamedi, lavdërim dhe paqja qofshin mbi të, vdiq, ndërsa Abdullah ibën Abasi nuk i kishte plotësuar dymbëdhjetë vjeç. Allahu e di më së miri!

 

Alaudin Abazi
4.10.2009