Pyetja:

Selam alejkum
Desha ta di a bën të falem me sy mbyllur për arsye se sixhadeja dhe gjërat përreth më tërheqin vëmendjen e me sy mbyllur përqendrohem shumë më shumë. Allahu ju shpërbleftë!


Përgjigjja:

Alejkum selam ue rahmetullahi ue berekatuhu!

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.


Shumica e dijetarëve kanë thënë se mbyllja e syve gjatë namazit është mekruh (e urryer) dhe janë argumentuar me hadithin që transmeton Taberaniu dhe Ibn Adij nga Ibn Abasi, Allahu qoftë i kënaqur me të, ku Pejgamberi alejhi selam ka thënë: "Kur ndonjëri prej jush të ngrihet për të falur namaz, mos t’i mbyll sytë e tij."

Dhe e kanë shpjeguar shkakun duke thënë se nëse njeriu i mbyll sytë, i përngjan njeriut që është fjetur, po ashtu ai humb një sunet të namazit, që është shikimi në vendin e sexhdes sa është në këmbë.

Mirëpo e kanë lejuar në rast se ka diçka para tij që sheh dhe ia humb përqendrimin në namaz. Në këtë rast lejohet t’i mbyllë sytë që mos të shikojë atë që ka përpara dhe ia humb përqendrimin, si p.sh. nëse ka ndonjë fotografi interesante që ia tërheq syrin dhe gjëra të ngjashme.