Pyetja:

Es selamu alejkum! Allahu ju shpërbleftë për punën tuaj.
Doja t’ju pyesja për dy emrat e fëmijëve të mi. Unë së bashku me bashkëshortin jemi munduar që të jenë emra muslimanë, po nuk e di... Vajza quhet Rejana, këtë emër unë e kam vënë me nijetin e derës në xhenet, po në disa faqe islame nuk më ka dalë kështu, p.sh. Rajan është emri i derës. Djali quhet Dejan. Unë i thashë bashkëshortit që nëse është nga emrat e Allahut me sa di nuk lejohet, po ai tha po e vendosim me nijetin prijës, mbase i pëlqeu se edhe emri i tij fillon me D.
Po ajo që më mërziti më shumë është se kohët e fundit më kanë thënë se është emër serb. Djali është 3 vjeç. Si të bëj?
Po ju pyes dhe për emrin tim. Unë quhem Silva. A është obligim ta ndërroj emrin duke qenë se tani kemi dhe një aktivitet privat me dokumente në emrin tim?


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen, mbi shokët dhe mbi të gjithë ata që ndjekin rrugën e tij deri në Ditën e Gjykimit.

Fillimisht ju përshëndesim dhe ju urojmë mirëseardhjen në faqen tonë, gjithashtu ju përgëzojmë për interesimin që keni shprehur në lidhje me emrat e fëmijëve tuaj dhe për përkujdesjen që keni treguar me bashkëshortin tuaj në përzgjedhjen e emrave të fëmijëve. Në lidhje me atë se sa ia keni arritur qëllimit, themi se nga njeriu kërkohet të japë mundin, ndërsa përsosmëria dhe saktësia absolute i takon vetëm Allahut të Lartësuar.

Emri “Rejana” në gjuhën arabe është emër i gjinisë femërore dhe është mjaft i përdorshëm. Domethënia e këtij emri është “e butë”, “e ëmbël”, “e ndjeshme”.
Ndërsa sa i përket emrit të një dere të xhenetit, në hadith thuhet: “Xheneti ka një derë që ka emrin Rejjan, Ditën e Gjykimit nëpërmjet kësaj dere do të hyjnë agjëruesit dhe nuk do të hyjë me ta askush tjetër. Do të thirret: “Ku janë agjëruesit?” dhe do të hyjnë nga ajo derë. Kur do të hyjë i fundit, do të mbyllet dhe nuk do të hyjë më askush nga ajo derë.” Shënon Muslimi.
Nga ky hadith kuptuam se emri i derës së xhenetit është “Rejjan” dhe ndoshta është më e përshtatshme që ky emër të përdorët si i gjinisë mashkullore. Por edhe “Rejana” është emër i bukur, ka kuptim të mirë dhe është mjaft e përdorshme. Prandaj nuk keni fare arsye pse të merakoseni dhe të shqetësoheni.

Emri “Dejan”, nëse shquhet “Ed-dejjan” është emër nga emrat e Allahut të Lartësuar. Hatabiu rreth kuptimit të këtij emri të Allahut të Lartësuar thotë se “Ed-dejan” është “Ai që kthen (shpërblen) me të mira”. Gjithashtu “Ed-dejan” mund të ketë kuptim “Gjykatësi” dhe “Sunduesi”. Ibën Ethiri thotë: “Emri i Allahut: “Ed-dejan” është “Nënshtruesi”, dhe “Gjykatësi””.

Ndërsa përdorimi i këtij emri në të pashquar për njerëzit “Dejjan” nuk është i njohur te muslimanët dhe nuk përdoret si emër mashkulli, edhe pse themi se në esencë nëse përdoret i pashquar, nuk mendojmë se është i ndaluar (haram), sikurse përdorimi i emrave “Latif”, “Halim”, “Gafurr” etj. Këta emra nëse përdoren të shquar “El-Latif”, “El-Halim” dhe“El-Gafurr”, atëherë janë emra të Allahut të Lartësuar, por nëse bëhen të pashquar, atëherë mund të përdoren për njerëz, por më mirë është t`u largohemi atyre.
Gjithashtu është e vërtetë se emri “Dejan” është mjaft i përhapur në gjuhën serbe, por nuk e dimë se ka ndonjë domethënie në këtë gjuhë dhe nuk e dimë se me çfarë ndërlidhet.

Në lidhje me ndërrimin e emrit tuaj, themi se në përgjithësi emrat të cilat duhet të ndryshohen janë ata emra të cilët kanë kuptime të këqija dhe paraqesin simbole të feve dhe ideologjive të jobesimtarëve. Më herët kemi dhënë një përgjigje rreth emrave, prandaj nëse doni të dini më gjerësisht rreth kësaj mund të ktheheni aty. Allahu e di më së miri!

http://www.klubikulturor.com/A-lejohet-ti-lihet-femijes-emri-Diar-apo-Dijar.htm

Alaudin Abazi
18.7.2008