Pyetja:

Selam alejkum!
Doja të pyesja a është e padëshirueshme të lexohet Bibla (qoftë edhe për qëllime studimesh) dhe a bën të lexohen librat që dalin kundër fesë islame, siç është “The true Furkan” dhe a bën t’i njoftojmë njerëzit për libra të tillë duke pasur qëllim të mirë. Allahu ju shpërbleftë për punën që bëni!


Përgjigjja:

   Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen, mbi shokët dhe mbi të gjithë ata që ndjekin rrugën e tij deri në Ditën e Gjykimit.

   Së pari duhet të sqarojmë se librat e mëhershëm si Ungjilli, që iu zbrit Isait alejhi selam, Tevrati që iu zbrit Musait alejhi selam, të gjithë janë të anuluar (shfuqizuar) me zbritjen e librin të fundit, Kuranit.
   Pastaj edhe këta libra të mëhershëm nuk janë të ruajtur në origjinal ashtu siç është ruajtur Kurani. Librat më të vjetër që u janë dërguar të Dërguarve të mëparshëm nuk e kanë ruajtur origjinalitetin e tyre, por u janë nënshtruar shtrembërimit, falsifikimit dhe humbjes së tekstit. Këtë e pranojnë edhe vetë pasuesit e këtyre librave.
   Duke pasur parasysh këto gjëra, vërehet se nuk lejohet të lexohen dhe shpërndahen këta libra, posaçërisht tek ata që nuk kanë njohuri islame dhe mund të ndikohen nga dyshimet e pranishme në to. Leximi i këtyre librave lejohet vetëm nëse është për qëllim zbardhja e kontradiktave dhe gabimeve të pranishme në besimet e tyre. Allahu e di më së miri!

 

Alaudin Abazi
22.2.2008