Pyetja:

Es-selamu alejkum!
A është bidat të thuhet “Allahume ente selam ve minke selam tebarekte ja dhel-xhelali vel ikram”?



Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen, mbi shokët dhe mbi të gjithë ata që ndjekin rrugën e tij deri në Ditën e Gjykimit.

Thënia "Allahume ente selam ve minke selam, tebarekte ja dhel-xhelali vel ikram" është sunet të thuhet pas përfundimit të namazit. Kjo është një praktikë që Muhamedi salallahu alejhi ue selem e ka bërë gjithmonë pas namazeve farze dhe askush nuk e thotë se kjo është bidat apo e ndaluar të thuhet.
Ndoshta ajo që ju keni dëgjuar është se nuk është nga Suneti që kjo praktikë të bëhet në formë grupore, me zë të lartë, ashtu siç është e përhapur në vendin tonë, pasi te ne këtë thënie e bën vetëm njëri nga falësit (muezini), me zë të lartë dhe të tjerët vetëm dëgjojnë, kurse nga Suneti është që të gjithë falësit, pasi të japin selam, secili ta thotë në vete këtë fjalë, pastaj të thotë lutjet që Muhamedi salallahu alejhi ue selem zakonisht i bënte pas selamit dhe të thotë 33 herë Subhanallah, 33 herë Elhmadulilah dhe 33 herë Allahu Ekber. Këto të gjitha janë nga Suneti që t’i bëjë secili në vete e jo që njëri t’i thotë lutjet, kurse të tjerët ta pasojnë atë. Allahu e di më së miri!


 

Alaudin Abazi
11.1.2008