Pyetja:

Allahu ju shpërbleftë për punën që po bëni dhe për përgjigjen e pyetjes sime, që ma dhatë. Unë këtë dua (lutje) e kam lexuar në një kalendar, është si një lloj libri dhe në të është kalendari vjetor dhe për çdo ditë të atij kalendari kanë shkruar hadithe të ndryshme të Muhamedit alejhi selam dhe dua të ndryshme e ndër to lexova edhe këtë dua. Ata kalendarë dalin çdo vit të rinj dhe i sheh njeriu edhe në xhamitë tona, por nuk më kujtohet se i cilit vit ka qenë ai kalendar, por do të mundohem nëse e gjej sepse nuk ishte i imi dhe t’ju tregoj se në cilin vit është shtypur ai kalendar dhe në cilën faqe gjendet. Sidoqoftë ju faleminderit shumë për përgjigjen tuaj, por desha të di nëse bën ta themi këtë dua apo jo. Allahu ju shpërbleftë dhe ju liroftë atëherë kur keni më së shumti nevojë! Amin!


Përgjigjja:

   Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen, mbi shokët dhe mbi të gjithë ata që ndjekin rrugën e tij deri në Ditën e Gjykimit.
   Dijetarët të cilët transmetojnë mënyrën se si ka marrë abdest i Dërguari, lavdërimi dhe paqja e Allahut qofshin mbi të, përcjellin se lutjet të cilat i këndonte ai pas marrjes së abdestit janë ato të cilat i kemi përmendur në përgjigjen e mëhershme. Këto lutje janë të mbështetura në hadithe të sakta dhe ne si muslimanë duhet t`u përmbahemi atyre.
   Sa u përket lutjeve të tjera, nëpër libra të ndryshëm kemi të përmendura me dhjetëra sosh, që thuhen qoftë gjatë abdestit qoftë pas përfundimit të tij, por ato nuk janë të mbështetura në hadithe të sakta dhe të qëndrueshme. Këto lutje kryesisht ose janë të shkruara nga njerëzit ose janë të mbështetura në hadithe të dobëta dhe të paqëndrueshme. E drejta është që ne të ndalemi te praktika e Muhamedit salallahu alejhi ue selem ashtu si na urdhëron Allahu i Lartësuar: “Çka t’ju japë Pejgamberi, atë merrni, e çka t’ju ndalojë, përmbajuni dhe kini frikë Allahun.” (Hashër, 7)
   Të gjithë shokët e Muhamedit salallahu alejhi ue selem, të cilët përcjellin formën e abdestit të tij, tregojnë me detaje çdo lëvizje që ka bërë gjatë abdestit, qoftë edhe më të voglën. Këta të gjithë nuk e përcjellin këtë lutje, prandaj është e drejtë që ne t`i përmbahemi asaj që përcillet saktë nga ai.
Lutjet të cilat nuk janë të mbështetura në argumente të qëndrueshme, që këndohen në raste të caktuara apo në kohë të caktuara (sikurse pas abdestit, pas namazit etj.), edhe nëse kanë kuptim të mirë nuk lejohet të përligjen për shkak se çdo vepër për të cilën në Islam themi se është e preferuar apo sunet të thuhet, në këtë vend apo në këtë rast, duhet të ketë mbështetje në argumente të qëndrueshme. Përndryshe, nëse nuk veprohet me këtë esencë, atëherë në Islam do të shpiken vepra dhe thënie të cilat nuk janë praktikuar në kohën e Muhamedit salallahu alejhi ue selem dhe me këtë largohemi nga udhëzimi i tij. Allahu e di më së miri!

Alaudin Abazi
4.4.2008