Pyetja:

Es-selam alejkum ue rahmetullah ue berekatuhu!
Kam disa pyetje në lidhje me leximin e sureve në namaz.
1. Cilat janë mendimet e dijetarëve në lidhje me leximin e “bismilahit” pas sures Fatiha?
2. Nëse lexon më tepër se një sure pas Fatihasë, si p.sh. në rekatin e trete të namazit të vitrit, a duhet t’i ndajmë me “bismilah”?
3. Nëse lexojmë një sure më të gjatë, a mund ta lexojmë një pjesë në rekatin e parë e një pjesë në rekatin e dytë?
Allahu ju shpërbleftë për punën që bëni dhe Allahu ju ndihmoftë në këtë punë!
Es-selam alejkum!



Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen, mbi shokët dhe mbi të gjithë ata që ndjekin rrugën e tij deri në Ditën e Gjykimit.

1. Leximi i “besmeles”, pasi ta përfundojmë Fatihanë, nuk është gjithmonë e kërkuar. Kjo varet se çfarë këndojmë pas Fatihasë; nëse këndojmë ndonjë sure nga fillimi, atëherë duhet ta fillojmë suren me “besmele”, nëse fillojmë këndimin e sures nga ndonjë vend tjetër (p.sh. nga mesi i ndonjë sureje), atëherë “besmeleja” nuk këndohet.
2. Nëse lexon pas Fatihasë më shumë se një sure, p.sh e lexon suren Felek dhe Nas në të njëjtin rekat, atëherë kërkohet të thuhet “besmelja” në fillim të sures Nas ashtu si kërkohet të thuhet në fillim të sures Felek, pasi “besmelja” thuhet në fillim të secilës sure, por në këtë rast nëse jemi imam dhe këndojmë me zë, atëherë “besmeleja” thuhet me zë të ulët.
3. Nëse lexojmë ndonjë sure që është e gjatë, lejohet të ndahet në dy pjesë dhe njërën pjesë ta lexojmë në rekatin e parë kurse pjesën tjetër në rekatin e dytë. Por këtu duhet të kemi kujdes ku e bëjmë ndarjen, pasi është e mundur të bëhet ndarja aty ku i ndryshohet kuptimi dhe konteksti, prandaj është e rrugës që këtë ta bëjmë duke u këshilluar nga hoxha se ku të bëhet ndarja. Allahu e di më së miri!

Alaudin Abazi
2.11.2007