Pyetja:

Kam një pyetje në lidhje me djalin tim. Është tre vjeç e gjysmë, por nuk flet si fëmijët e tjerë të kësaj moshe. E kam pasur te mjeku. Më kanë thënë se është një sëmundje psikike. Disa më thonë që ta çoj te ndonjë hoxhë, që t’i fryjë. Mund t’u them se gati prej një viti jam i zemëruar nga kjo çështje. Ju lutem për një mendim tuajin, se ç’do të ishte më mirë të bëja në lidhje me këtë gjë. Do të ishte mirë një përgjigje e shpejtë. Ju faleminderit!


Përgjigjja:

   Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen, mbi shokët dhe mbi të gjithë ata që ndjekin rrugën e tij deri në Ditën e Gjykimit.
   Fillimisht ju kërkojmë falje për vonimin e përgjigjes, pasi arsyeja nuk ishte mosinteresimi ynë për problemin që ju keni. Vërtet e kemi parasysh problemin me të cilin jeni duke u ballafaquar. Shpeshherë fëmija bëhet shkak që prindërit të kalojnë momente presioni dhe preokupimi të tepruar në faza të ndryshme të jetës. Nëse ai është i sëmurë, momentet më të vështira për ata të dy janë ato para identifikimit të sëmundjes. I sheh prindërit të stresuar, të mërzitur, të frikësuar, të hidhëruar si dhe sheh veprime të tjera që janë reflekse të momenteve që përjetojnë. Prandaj themi se momentet që po përjetoni tani janë pothuajse normale dhe ashtu do ta ndiente veten secili prind që gjendet në situatën tuaj.
   Ajo me çka do t’ju këshillonim në këtë rast është që t’ju përkujtojmë se caktimi i Allahut është primar në çdo gjë. Ju duhet ta keni parasysh se të gjithë jemi të Allahut dhe asnjëri nga ne nuk ka mundësi të dalë jashtë dëshirës dhe vullnetit të Tij. Ai kujt të dojë, i dhuron fëmijë dhe kë do, e lë shterpë. Allahu i Lartësuar thotë: “Vetëm i Allahut është pushteti i qiejve e i tokës; Ai krijon çka të dojë; Ai i fal vetëm femra atij që do; e i falë vetëm meshkuj atij që do. Ose u fal çift, meshkuj e femra, por atë që do e lë pa fëmijë (steril); Ai është i dijshëm, i fuqishëm.” (Shura, 49-50)
   Prandaj, ju duhet ta keni parasysh se sëmundjet, fatkeqësitë, vdekja, hidhërimi, etj., janë pjesë e jetës ashtu sikurse gëzimi, lumturia, shëndeti, etj.. Në jetën tonë kemi diçka nga kjo dhe ajo. Ky është dallimi esencial i besimtarit nga jobesimtari, pasi besimtari të gjitha këto i pret dhe është i vetëdijshëm se janë me caktimin e Allahut, kurse jobesimtari gëzimin dhe lumturinë e pret duke pretenduar se janë gjëra që i fitoi vetë e janë të tijat dhe harron dhuruesin e tyre. Në anën tjetër, fatkeqësitë dhe vështirësitë i pret duke i tejkaluar kufijtë dhe duke mos e përmbajtur veten dhe duke i akuzuar të tjerët se ata janë shkaktarë për ato që përjeton ai.
   Ndërsa besimtari dallon nga jobesimtari dhe nga ata që e kanë besimin të luhatshëm. I Dërguari, lavdërimi dhe paqja e Allahut qofshin mbi të, me një hadith ka thënë: "Është e çuditshme çështja e besimtarit! Çdo situatë për të është në dobi të tij (në të mirë të tij). Në qoftë se i ndodh ndonjë e mirë, e falënderon Allahu e Lartësuar, për çka do të shpërblehet. Nëse e godet ndonjë fatkeqësi apo dëm, ai tregon durim e përmbahet dhe kjo i sjell shpërblim nga Allahu i Lartësuar.” (Shënon Muslimi)
   Në këtë thënie të Muhamedit salallahu alejhi ue selem tregohet qartë se besimtari me durimin e tij është në gjendje të rikthehet tek ngushëllimi i vetvetes pas ndodhjes së fatkeqësisë dhe ta rikthejë forcën për t’u ballafaquar me jetën me të gjitha valët e saj dhe për të gjetur vetëbesimin dhe rehatinë shpirtërore.
   Allahu i Lartësuar thotë: "Ata që besuan dhe përmendën Allahun, zemrat e tyre qetësohen; dijeni se me përmendjen e Allahut zemrat stabilizohen." (Er Rrad, 28)
   Kjo ishte sa i përket përkujtimit. Në lidhje me veprimet konkrete, se çfarë të ndërmerrni, themi se, së bashku me kontrollet që ia bëni te mjeku, është e mundur ta dërgoni edhe te ndonjë hoxhë që bën rukje me Kuran dhe Sunet dhe ai t’i këndojë Kuran. Janë një numër i caktuar hoxhallarësh të cilët bëjnë rukje, por të keni kujdes të mos e dërgoni tek ata të vetëquajtur “hoxhallarë”, të cilët mashtrojnë duke shkruar hajmali dhe u marrin para njerëzve.
   Në fund, lus Allahun e Lartësuar ta shërojë fëmijën tuaj dhe ta bëjë respektues së pari ndaj Allahut të Lartësuar, pastaj edhe ndaj prindërve të tij. Amin!
 

Alaudin Abazi
21.12.2007