Pyetja:

Selam alejkum!
Allahu ju shpërbleftë për mundin. Kohët e fundit shtëpinë tonë disi e kapi një kob. Një anëtar i familjes u godit nga një veturë, pastaj tjetri u desh të operohet, pastaj babai pati probleme kardiologjike. Prej Allahut është dhe jemi të kënaqur me caktimin e Tij.
Na ka kapur pak një frikë, prandaj a ka mundësi të na tregoni se ç’mund të bëjmë në këtë kohë për të qenë më stabilë?
Selam alejkum!


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen, mbi shokët dhe mbi të gjithë ata që ndjekin rrugën e tij deri në Ditën e Gjykimit.

Çdo njeri në jetë ka batica dhe zbatica, ballafaqohet me probleme duke u preokupuar për zgjidhjen e tyre, ashtu si përjeton lumturi e gëzime, të cilat i kujton gjatë jetës. Kështu është jeta dhe nuk ka mundësi që ajo të përjetohet vetëm në një formë dhe vetëm me një ngjyrë. Edhe njerëzit më të dashur të Allahut, Pejgamberët, kanë përjetuar mundime dhe tortura. Kemi Pejgamberë që janë vrarë, janë burgosur, janë përzënë nga shtëpitë e tyre, janë sëmurë, janë tradhtuar etj. Po të kishte meritë dikush nga njerëzit që të ishte vetëm i lumtur, atëherë këtë meritë do ta kishin së pari të Dërguarit e zgjedhur. Prandaj ju këshillojmë që kështu ta kuptoni jetën dhe se pushimi, rehatia, lumturia e vërtetë është ajo e përhershmja, e pandërprera, e cila nuk mund të arrihet në këtë botë, por në botën tjetër.
Edhe natyra e një familjeje është kështu. Në të do të ketë lumturi, gëzime e hare, por gjithashtu do të ketë hidhërime, sëmundje, vdekje, etj..
Prandaj, ju këshillojmë që të bëni durim, se me të vërtetë fituesit janë ata që tregojnë qetësi dhe i dorëzohen Allahut të Lartësuar dhe caktimit të Tij, në Dorën e të Cilit është e mira dhe e keqja. Prandaj kthehuni tek Ai dhe mbështetuni Atij. Pastaj mos neglizhoni kryerjen e urdhrave dhe largimin nga ndalesat, pasi kjo është forma më e mirë e mbështetjes dhe e afrimit ndaj Allahu të Lartësuar.
Gjithashtu prej gjërave që na ka informuar Allahu është edhe ajo se pas vështirësive do të vijnë lehtësimet dhe muslimani duhet të jetë optimist në jetë dhe të besojë se pas vështirësive do të pasojnë lehtësimet. Ashtu si ka thënë Allahu i Lartësuar në Kuranin Famëlartë “Vërtet pas vështirësisë vijnë lehtësimet” (Inshirah, 5)
 

Alaudin Abazi
2.11.2007