Zhveshja është mëkat ndaj Allahut të Lartësuar dhe të Dërguarit të Tij

Ai që i bën mëkat Allahut të Lartësuar duhet ta dijë se nuk i ka bërë dëm askujt tjetër përveç vetes së tij. Besimtare e vërtetë dhe e devotshme është ajo femër e cila u nënshtrohet urdhrave të Allahut të Lartësuar dhe të Dërguarit të Tij dhe nuk shikon anash se çka do të thonë njerëzit për të. Nuk i lejohet ndonjë besimtari apo besimtareje të shikojë ndonjë zgjidhje tjetër në çështjet të cilat i ka urdhëruar apo ndaluar Allahu i Lartësuar. Allahu i Lartësuar thotë: "Kur Allahu ka vendosur për një çështje, ose i Dërguari i Tij, nuk i takon (nuk i lejohet) asnjë besimtari dhe asnjë besimtareje që në atë çështje të tyre personale të bëjnë ndonjë zgjidhje tjetërfare. E kush e kundërshton Allahun dhe të Dërguarin e Tij, ai është larguar shumë larg së vërtetës." (El Ahzab, 36)

Shejh Abdurrahman Es-Sa'di (një prej komentuesve të Kuranit), kur e komenton ajetin e lartpërmendur, "nuk i takon (nuk i lejohet) asnjë besimtari dhe asnjë besimtareje" ka thënë: “Kjo nënkupton se një person i cili e ka quajtur veten besimtar apo thotë se ka iman në zemrën e tij, duhet që të vrapojë drejt veprave të mira që e kënaqin Allahun e Lartësuar dhe të Dërguarin e Tij dhe të largohet nga veprat që e hidhërojnë Allahun e Lartësuar dhe të Dërguarin e Tij. Duhet t’i kryejë urdhrat e Allahut dhe të të Dërguarit të Tij dhe të largohet nga ndalesat e Allahut dhe të të Dërguarit të Tij. Nuk i takon një besimtari dhe besimtareje "Kur Allahu ka vendosur për një çështje ose i Dërguari i Tij...", "...që në atë çështje të tyre personale të bëjnë ndonjë zgjidhje tjetërfare." d.m.th. që të shikojnë se a ta kryejnë atë urdhër apo jo. Dhe çdo besimtar dhe besimtare e di se Pejgamberi salallahu alejhi ue selem është më prioritar tek ai sesa edhe vetja e tij, pra mos ta bëjë epshin e tij pengesë mes tij dhe urdhrave të Allahut të Lartësuar dhe të Dërguarit të Tij.
"E kush e kundërshton Allahun dhe të Dërguarin e Tij, ai është larguar shumë larg së vërtetës." Është larguar larg së vërtetës sepse ai është larguar nga rruga e vërtetë, e cila të çon drejt mirësisë së Allahut të Lartësuar, është larguar nga kjo rrugë e vërtetë në një rrugë e cila të çon në një dënim të dhimbshëm.” (Tefsir Es-Sa'di, f.612)

Pejgamberi salallahu alejhi ue selem në hadithin që e transmeton Ebu Hurejra, Allahu qoftë i kënaqur me të, ka thënë: "Krejt umeti (populli) im do të hyjë në xhenet, përveç ata që nuk dëshirojnë." I thanë të pranishmit: “E kush është ai i cili nuk dëshiron, o i Dërguar i Allahut?” Pejgamberi salallahu alejhi ue selem tha: "Ai i cili më nënshtrohet mua (urdhrave të mia) do të hyjë në xhenet, kurse ai i cili nuk u nënshtrohet urdhrave të mia, ka refuzuar (të hyjë në xhenet)." (Buhariu 7280)

Zhveshja është mëkat i madh

Ka ardhur Umejme bintu Rukije te Pejgamberi salallahu alejhi ue selem për t’ia dhënë besën për Islam. Pejgamberi salallahu alejhi ue selem tha: “Ma jep besën që nuk do t’i bësh shirk (shok) Allahut, nuk do të vjedhësh, nuk do të bësh zina (amoralitet), nuk do ta mbytësh fëmijën dhe nuk do të bësh ndonjë mëkat..., nuk do të lëkundësh (në fe) dhe nuk do të zhvishesh ashtu sikurse në kohën e injorancës.” Imam Ahmedi në Musnedin e tij 2/196, dhe Ahmed Shakir ka thënë se hadithi është sahih.

Shiko se si e ka krahasuar Pejgamberi salallahu alejhi ue selem zhveshjen e një femre me shirkun, amoralitetin, vrasjen e fëmijëve etj. Ky hadith tregon shumë qartë se sa mëkat i madh është zhveshja.

 

Eroll Nesimi
12.9.2008