Ditët e teshrikut janë dita e 11-të, e 12-të dhe e 13-të e muajit të Dhulhixhes dhe agjërimi i këtyre ditëve është i ndaluar. Transmeton Nubejshe el-Hudhelij, se i Dërguari Muhamed salallahu alejhi ue selem ka thënë: “Ditët e Teshrikut janë ditë të ushqimit, të pijes dhe të përmendjes së Allahut.” (Muslimi 1141)

Hamze ibn Amri thotë se ka parë një njeri në Mine, i cili i vëzhgonte njerëzit dhe u thoshte: “Mos agjëroni këto ditë (të teshrikut) sepse këto janë ditë të ushqimit dhe të pijes.” Kurse i Dërguari salallahu alejhi ue selem e shikonte atë (Ahmedi 16081. Shejh Albani ka thënë se hadithi është sahih, shih Sahih El Xhami 7355.)

Kurse Ebi Mure tregon se ka hyrë me Abdullah ibn Amrin tek babai i tij, Amr ibnul Asi, Allahu qoftë i kënaqur me të dy, dhe ai u ka ofruar ushqim dhe u ka thënë të hanë. Ai ia kishte kthyer: “Unë jam agjërueshëm.” Amri tha: “Ha, sepse në këto ditë i Dërguari salallahu alejhi ue selem na ka urdhëruar të hamë dhe na ka ndaluar të agjërojmë.” Maliku ka thënë: “Këto ditë janë ditët e teshrikut.” (Ahmedi 17314, Ebu Davudi 2418, shejh Albani ka thënë se hadithi është sahih. Shih Sahih Ebu Davud.)

Kurse Sad ibn Ebi Vekasi thotë: “Më ka urdhëruar i Dërguari salallahu alejhi ue selem që t’i thërras njerëzit ditën e Mines: “Këto ditë (ditët e teshrikut) janë ditët e ushqimit dhe të pijes dhe nuk ka agjërim në këto ditë.” (Ahmedi 1459)

Këto hadithe dhe të tjera tregojnë se agjërimi i këtyre ditëve është i ndaluar dhe për këtë shumicë e dijetarëve kanë thënë se është i ndaluar agjërimi vullnetar i këtyre ditëve.

Eroll Nesimi
7.12.2008