Pyetja:

E nderuara redaksi!

Së pari, ju falënderoj për kohën që do t'ia kushtoni e-mailit tim bukur të gjate dhe po ashtu problemit tim që do ta shtjelloj në të.

E di se pyetja ime e ka vendin ne rubrikën e "Ëndrrave " por pasi e lexova se lexuesit luten të mos shkruajnë për një kohë aty, të them drejt nuk pata durim  dhe po ju drejtohem këtu, besoj se do te merrni parasysh letrën time çka ju falënderoj shumë!

Unë do të mundohem që sa më shkurt e me qartë te tregoj problemin tim!

Unë jam një grua e martuar tash 9 vite, kam një burrë shumë të mirë, por kam një problem të madh, nuk kam fëmijë. Kam bëre të gjitha analizat dhe kontrollet e mundshme dhe deri sot asnjë rezultat negativ, d.m.th çdo gjë është si me së miri tek unë dhe tek burri. Problemi është tek ëndrra...tek ëndrra që e shoh gati 8 vite....Në ëndërr me vjen vazhdimisht një grua e cila me trishton me sytë e saj të këqinj, me vjen rregullisht çdo muaj, në fillim të ciklit, në mes të tij dhe në përfundim te tij...Jam lodhur aq shumë sa besoj se më besoni e më kuptoni çka do të thotë të ëndërrosh 8 vite të njëjtën ëndërr....Unë agjëroj, besoj në Allahun, lexoj dua, por nuk di të falem. Kam qenë te disa hoxhallarë nga meraku i madh, dhe të gjithë më kanë thënë se kjo është nga magjia që më bën dikush. Burrit i ka humbur unaza e martesës pas 8 muajve martese, unë kam gjetur rroba të mia të prera kur isha në shtëpinë e burrit në Kosovë para disa viteve. Para gati dy viteve mbeta shtatzëne për herë të parë, por shtatzaninë ma prishi po ajo ëndërr. Ajo grua më erdhi në ëndërr me prehrin plot gjarpërinj, mi lëshoi para meje dha ata (gjarpërinjtë) përmes lëkurës sime mu futën në trup. Sot e atë ditë mjekët nuk kanë arritur të gjejnë arsyen e dështimit të shtatzanisë, ku çdo gjë nga  ana shëndetësore ka qenë si më së miri. Vitet po ikin, por unë ende po arrij të mos e humb shpresën se do të kem fëmijë. Unë u mundova t’i bie sa më shkurt tërë problemit tim. Ju falënderoj me qindra herë, për kohën që do të gjeni të më përgjigjeni dhe ndihmën  tuaj! Zoti ju ndihmoftë!

Përgjigja:

Falënderimet i takojnë Allahut, paqja dhe bekimet e Tij qofshim mbi të dërguarin e Tij Muhamed, mbi familjen, shokët dhe të gjithë ata që ndjekin rrugën e tij deri në Ditën e Gjykimit.

Motër e nderuar!

 E kemi marrë pyetjen tuaj dhe pas konsultimit me disa nga ata që kanë më shumë njohuri në këtë fushë themi se juve është e mundur të jeni goditur nga magjia, edhe pse kjo nuk është një gjë e prerë dhe e sigurt, por sido që të jetë, ne do t`ju këshillonim me këto këshilla.

1. Së pari të mësoni faljen dhe të filloni faljen e namazit rregullisht, pasi namazi është lidhja më e fortë që mund ta ketë njeriu, gjegjësisht besimtari, me Zotin e tij. Ai i cili i forcon raportet me Krijuesin e tij, në Dorën e të Cilit është çdo gjë dhe në botë nuk ndodh asgjë vetëm se me dijen dhe lejen e Tij, vërtet njeriu i tillë ka bërë një zgjedhje të qëlluar dhe assesi Allahu i Lartësuar nuk e humb atë njeri që i mbështetet Atij.

2. Mundohuni në praktikimin e lutjeve të mëngjesit dhe mbrëmjes dhe gjithmonë ta kesh në mendje Allahun e Lartësuar dhe ai që është i sinqertë me Të nuk ka mundësi t`i bëj keq askush. Gjithashtu edhe lutjet para gjumit. Këto lutje mund t`i gjesh në librin “Mburoja e myslimanit” e cila është mjaft e shpërndarë e mund ta gjesh edhe në internet.

3. Këshilloje edhe burrin t`i kthehet Allahut në praktikimin e faljes dhe riteve të tjera.

4. Marrëdhënieve seksuale me burrin t`i paraprini me bismilah dhe lutjen të cilën na e mëson Profeti (salallahu alejhi ue selem) ta themi.

Muhamedi (salallahu alejhi ue selem) thotë: “Nëse ndonjëri prej jush bën marrëdhënie intime me gruan e tij, le të thotë kështu: “Bismilahi, Allahume xhenibna shjetan ue xhenibi shejtane ma rezektena.”  Që do të thotë: “O Allah, largoje shejtanin nga ne dhe nga ajo foshnje që do të na e falësh.” Vazhdon Muhamedi (salallahu alejhi ue selem) duke thënë: “Dhe nëse atyre u lind fëmijë (nga ai akt) atëherë asnjëherë shejtani nuk do ta dëmtojë atë.”[1]

5. Nëse keni shkuar te ndonjë ‘hoxhë’ që punon me magji dhe ju ka dhënë hajmali apo diçka të ngjashme, hidheni atë dhe digjeni, pasi kjo nuk është e lejuar në Islam.

6. Është mirë nëse dëgjoni që dikush atje shëron me rukje (pra me shërim të bazuar në Kuran dhe Sunet, larg nga çdo shirku dhe risie), atëherë mund të shkoni tek ai t’ju këndojë Kuran.

Këto ishin këshillat që na u kujtuan për ju, lusim Allahun e Lartësuar t’ju shërojë nga kjo, t’ju furnizojë me fëmijë dhe të arrini lumturi në këtë botë dhe në botën tjetër! Amin!