Allahu i Lartësuar thotë: “S'ka dyshim se besimtarët janë vëllezër, pra bëni pajtim ndërmjet vëllezërve tuaj dhe kini frikë Allahun, që të jeni të mëshiruar (nga Zoti).”

Vëllazëria për Allah nuk shkëputet asnjëherë. Ajo është e lidhur edhe në këtë jetë, por edhe pas vdekjes. Për këtë lidhja vëllazërore prej fesë ekziston prej kohës së Ademit deri në Ditën e Gjykimit. Për këtë shohim se Islami i ka kushtuar edukimit vëllazëror një kujdes të veçantë dhe i ka dhënë përparësi ndaj vëllazërisë prej gjakut kur janë të ndryshëm në fe.

Ky ajet ka ardhur në radhë pas ajetit i cili flet për luftën që duhet t’ia bëjmë atij i cili tejkalon kufijtë prej besimtarëve dhe thotë Allahu: “S'ka dyshim se besimtarët janë vëllezër.”

Allahu thotë se ju kam urdhëruar që të pajtoni këto dy grupe që luftojnë mes tyre, sepse lufta ka ndodhur në mes të muslimanëve e jo në mes të armiqve. Po ashtu, nga ky ajet kuptojmë se si muslimani duhet të kujdeset për vëllezërit e tij muslimanë dhe mos të fusë mospajtime në mes tyre. Kush lexon librat e historisë së shokëve të Pejgamberit do ta gjejë këtë se sa rëndësi të madhe i ka kushtuar vëllazërisë në Islam.

Pastaj Allahu na porosit me devotshmëri, sepse devotshmëria është çelësi i çdo gjëje dhe tregon shkakun e devotshmërisë e cili është zbritja e mëshirës së Allahut. “Dhe kini frikë Allahun, që të jeni të mëshiruar (nga Zoti).”

Dobitë e ajetit:

1. Vërtetimi i vëllazërisë prej imanit.

2. Preferimi i përdorimit të fjalëve të cilat e nxisin njeriun në realizimin e asaj që kërkohet, bazuar nga fjala e Allahut: “Ndërmjet vëllezërve tuaj.”

3. Nxitja për devotshmëri.

4. Devotshmëria është prej shkaqeve të mëshirës së Allahut.

Përgatiti: Shaban Murati

02.12.2006