“Kjo është dhuratë dhe begati prej Allahut, e Allahu është i Dijshëm dhe i Urtë.”

Pra, ky ajet tregon se këto të mira janë dhuratë prej Allahut. Po ashtu i tërheq vërejtjen njeriut që të  njohë begatitë e Allahut ndaj tij e sidomos begatinë e udhëzimit. Kush është Ai që të ka udhëzuar në rrugë të drejtë? Kush është Ai që ta bëri ty të dashur të vërtetën? Kush është Ai i cili të bëri që posa ta dëgjosh ezanin për namaz të shpejtosh në namaz? Kush është Ai i Cili kur vjen muaji i Ramazanit gëzohesh, ndërsa të tjerët prej njerëzve ndjejnë lodhje dhe rëndim, sikur po pret një mysafir shumë të rëndë? Kush është Ai i Cili ti dha tërë këto të mira?Ai është Allahu.

Përmes këtij ajeti, Allahu na tregon se gjithë këto të mira që ne i kemi, janë prej Allahut. Po në të njëjtin ajet Allahu na tërheq vërejtjen se është obligim i  besimtarit që ta falënderojë Atë. Sepse disa njerëz i sheh se janë të udhëzuar në rrugën e vërtetë, ndihmojnë fenë e Allahut, por në anën tjetër u pëlqen vetja e tyre, lavdërohen me ato dhe mendon se ka një vend të veçantë dhe një vlerë të veçantë në fenë e Allahut. Jo, vlera i takon Allahut, i Cili të bëri ty shkak për këtë. Begatia dhe vlera i takon Allahut, i Cili të ka bërë prej thirrësve në këtë fe apo të ka bërë kërkues të dijes. Ndërsa Pejgamberi (alejhi selam) thotë: “Kush  ndjek rrugën e diturisë, Allahu do t’ia lehtësojë atij rrugën për në xhenet.” Pra, Allahu është Ai i Cili të ka mundësuar të ndjekësh këtë rrugë e cila të shpie në xhenet. Begatitë e Allahut janë të shumta.

Pastaj Allahu, në fund të këtij ajeti, thotë: “E Allahu është i Dijshëm dhe i Urtë.”

Imam Kurtubi ka thënë: “I Dijshëm për atë që është në të mirën tuaj, ndërsa i Urtë në rregullimin e çështjeve tuaja.”

Ndërsa disa komentatorë të Kuranit kanë thënë: “I Dijshëm, e di se kush i meriton këto begati, ndërsa i Urtë, vendosja e këtyre begative tek ai që e meriton, sepse urtësi është ta vendosësh një gjë në vendin e duhur.”

Dobitë e këtij ajeti

1. Begatitë të cilat i arrin besimtarit në fe apo në dynja, janë vetëm prej Allahut.

2. Falënderimin e Allahut për begatitë që na i ka dhënë.

3. Largimi i lakmisë së vetvetes nga njeriu.

4. Vërtetimi i dy emrave prej emrave të Allahut dhe cilësitë që përmbajnë këta emra.

Përgatiti: Shaban Murati

25.11.2006