Pyetja:

Eselamu alejkum! Jam nga djalë dhe kisha një pyetje për t’ju bërë. Jam në hall, nëse mundeni më ndihmoni. Jam i lidhur me një vajzë qysh prej tre muajsh. Dalëngadalë kam nisur t’i tregoj për Islamin. Deshi Allahu e ka mësuar suren Fatiha, por jam në hall se kur e kam pyetur se a ke pas lidhje me ndonjë tjetër, me ka thënë që jo, po me ndihmën e Allahut e kam zbuluar se kishte dalë me një djalë 4 herë për të pirë kafe dhe ai e kishte puthur një herë.
Momentalisht jam hidhëruar dhe i kam thënë se do të mendohem një javë se çfarë të bëj me të. Nëse mundeni të më ktheni përgjigje në ketë imell se çfarë të bëj, a të vazhdoj me të apo jo? Allahu ju shpërbleftë!

Përgjigja:

Falënderimet i takojnë Allahut, paqja dhe bekimet e Tij qofshim mbi të dërguarin e Tij Muhamed, mbi familjen, shokët dhe të gjithë ata që ndjekin rrugën e tij deri në Ditën e Gjykimit.

Nga praktika jonë gjatë përgjigjes së pyetjeve është që të flasim edhe për gjërat e ndaluara, të cilat janë përmendur në pyetje, por që për to nuk është pyetja.

Për këtë, fillimisht, themi se dalja dhe kontakti i juaj me vajzë të huaj nuk është e lejuar, kurse ju keni kaluar shoqëri një kohë prej tre muajve me të. Kjo nga këndvështrimi islam është i ndaluar, edhe pse ndoshta për kohën dhe rrethanat në të cilat jetojmë është bërë normale kjo. Për këtë kemi folur në disa përgjigje të mëparshme.

Pastaj, nëse ju jeni të interesuar për vajzën, atëherë për t’u bashkuar me të, duhet të zgjidhni metoda dhe mënyra që janë konform mësimeve islame dhe me këtë do të arrini, duke mos e hidhëruar Allahun me mëkate, të bashkoheni me të.

Prandaj ju këshillojmë të jeni më vigjilent dhe më të përkushtuar ndaj mësimeve islame dhe të mundoheni gjatë jetës së përditshme t’i ikni ndeshjes me rrethanat që do të mund t’ju dërgonin në haram, pasi që më parësore për muslimanin është ruajtja e fesë. Rrini në kontakt me shokë nga të cilët do të përfitosh njohuri islame dhe mundohu të mësosh rreth mirësive islame.

Vërtet shpëtimi i njeriut në këtë botë dhe në botën tjetër arrihet nëse ai i përmbahet besimit në Allahun e Lartësuar.

Alaudin Abazi

24.02.2007