Pyetja:

Çfarë duhet bërë se më ka ndodhur disa herë që në sexhde të më vijnë dyshime se a e kam bërë vetëm një sexhde apo dy dhe nuk di a të bëj edhe një sexhde prapë apo të vazhdoj të ngrihem në këmbë? Desha të di si t’ia bëjë kur dyshon se a i ke bërë dy sexhde apo vetëm një, qoftë në rekatin e parë apo rekatet e tjera?

Përgjigja:

Nëse muslimani gjatë faljes dyshon, qoftë në numrin e sexhdeve, rekateve apo nuk di se a e ka bërë një vepër të kërkuar (ruknë apo vaxhib) apo jo, atëherë kemi dy raste:

1. Nëse dyshon dhe në vete ka dy opsione, por në njërën është më i sigurtë se kjo është e sakta, në këtë rast vepron sipas asaj që e sheh më të saktë.

Këtu mund të ilustrojmë rastin tënd si shembull. Duke qenë në sexhde dyshon se a i ka bërë dy sexhde apo një. Nëse ky është vetëm një dyshim që iu paraqit, pasi ai është i sigurtë që i ka bërë dy sexhde. D.m.th.: kjo është vetëm një vesves, atëherë kjo nuk ka asnjë rëndësi, por ai vazhdon namazin dhe e largon nga vetja këtë dyshim të pabazuar, duke e konsideruar se është në sexhden e dytë. Kurse nga ai kërkohet të bëjë sehvi sexhde në fund të namazit pas selamit.

Argument për këtë kemi hadithin e Profetit (salallahu alejhi ue selem) ku thotë: “Kush dyshon në namazin e tij dhe nuk di a ka falur tri rekate apo katër, le të zgjedhë atë që është më i sigurtë, le të plotësojë mbi këtë bazë, pastaj le të japë selam dhe le të bëjë dy sexhde.”(Transmeton Buhariu)

2. Nëse dyshon në dy opsione, por nuk është në gjendje ta vërtetojë se cila mundet të jetë e saktë, pra të dyja janë të njejta tek ai si të mundura, atëherë ai duhet të zgjedhë atë që është më e paktë (në sasi të veprave) dhe të plotësojë namazin në bazë të saj.

P.sh.: Nëse dyshon në sexhde dhe nuk di se a është kjo sexhdeja e parë apo e dytë për të dhe ai nuk është në gjendje të anojë në njëren opsion si e mundur, pra në asnjëren nuk është më i sigurtë, por të dyja janë të mundura, ai zgjedh atë që është më e paktë pasi ajo është e sakta e në këtë rast e zgjedh se është në sexhden e parë dhe vazhdon namazin në bazë të kësaj. Kurse në fund të namazit para selamit bën sehvi sexhde.

Argument për këtë rast kemi hadithin: “Nëse ndonjëri nga ju dyshon në namazin e tij dhe nuk di sa ka falur, tri apo katër rekate. Le ta largojë dyshimin dhe le të plotësojë (namazin) mbi atë që është i bindur, pastaj le të bëjë sehvi sexhde para selamit, nëse i ka falur pesë rekate, atëherë (ato dy sexhdet) do t`ia bëjnë namazin atij çift. Nëse i ka falur të plota (katër rekate), atëherë (këto dy sexhde) do të jenë për të, kundërshtim ndaj dëshirës së shejtanit.” (Muslimi)

Alaudin Abazi

08.03.2006