Pyetja:

Jam 15 vjeç. Prej cilës moshë jam i detyruar të falem?  

Përgjigja: 

Falenderimet i takojnë Allahut, paqja dhe bekimet e Tij qofshim mbi të dërguarin e Tij Muhamed, mbi familjen, shokët dhe të gjithë ata që ndjekin rrugën e tij deri në Ditën e Gjykimit.

Vëlla i dashur, së pari të përshëndesim dhe të urojmë për interesim tënd për Islamin. Më beso, kur muslimani dëgjon nga njerëz të moshës tënde që interesohen rreth Islamit dhe praktikimit të tij, e bën atë të ndiejë një shkëndijë të shpresës se këtë umet e pret rimëkëmbja, së shpejti me lejen e Allahut, pasi që jetojmë në një kohë ku shumë rrethana na detyrojnë që të humbim shpresën se vallë a do të ndodh kjo ndonjëherë!

Kurse sa  përket pyetjës tënde themi se muslimani obligohet me praktikimin e namazit dhe riteve të tjera të Islamit, kur arrin moshën e pjekurisë (pubertetit). Personi i cili e arrin këtë moshë quhet mukelef, që do të thotë se ai tani është i ngarkuar me obligime dhe përgjegjësi, prej të cilave ishte i lirë më heret. Mosha e pjekurisë konstatohet me disa shenja si te mashkulli, ashtu edhe te femra.

Shenjat e pubertetit te mashkulli janë njëra nga këto:

1.Plotësimi pesëmbëdhjetë vjet.

2.Ejakulimi, nëse kjo ndodh në gjumë apo i zgjuar.

3.Dalja e qimeve në pjesët e turpshme dhe në sqetulla.

Kurse shenjat e pubertetit te femrat janë njëra nga këto:

1.Plotësimi  dymbëdhjetë vjetë (në këtë ka edhe mendime të tjera, disa më pak vjet disa më shumë).

2.Ejakulimi, nëse ndodh në gjumë apo i zgjuar.

3.Dalja e qimeve në pjesët e turpshme dhe në sqetulla.

4.Praqitja e menstruacioneve.

Këto ishin shenjat e pubertetit te meshkujt dhe te femrat, por këtu duhet ta bëjë një vërejtje se mjafton të paraqitet njëra nga këto shenja që njeriu të konsiderohet mukelef, se ka hyrë në moshën e pjekurisë, pa marrë parasysh cila është ajo.

Alaudin Abazi

19.01.2006