Përsa i përket detyrave të Islamit, gruaja muslimane  është e njëjtë me burrin musliman. Ajo ka një mision në jetën e saj dhe kështu asaj i kërkohet të jetë e efekshme, aktive dhe sociale, sipas kushteve të veçanta dhe mundësive, duke kombinuar me gratë e tjera sa të mundet dhe duke ndarë me to qëndrime dhe sjellje të vlefshme në Islam, të cilat e dallojnë atë nga gratë e tjera. Kudo që gjendet gruaja muslimane, bëhet pishtar ndriçues i udhëheqjes apo drejtimit dhe një burim pozitiv i korrigjimeve të edukatës, me të dyja, fjalë dhe vepra.

Qëndrimi i mirë ndaj të tjerëve

     Gruaja muslimane është e një karakteri të mirë dhe fisnik e miqësor, kokëulur dhe e zgjuar. Ajo i pëlqen të tjerët dhe pëlqehet nga ata. Duke arritur këtë veçori, ajo ndjek shembullin e Profetit (Paqja dhe bekimi i Allahut qofshin mbi të!) i cili, siç thotë shërbëtori i tij Enesi, ishte më i miri prej njerëzve. Enesi (Allahu qoftë i kënaqur me të!) pa shumë nga qëndrimet e tij të mira dhe dëshmoi për këto sjellje, që askush nuk mund t’i imagjinojë se kanë ekzistuar tek ndonjë qënie tjetër njerëzore. Ai na tregon për një nga aspektet e karakterit fisnik të Profetit (Paqja dhe bekimi i Allahut qofshin mbi të!) duke na thënë: “I shërbeva për dhjetë vjet të Dërguarit (Paqja dhe bekimi i Allahut qofshin mbi të!)  dhe ai kurrë nuk më tha “uf!”  fjalën më të vogël përbuzëse. Në qoftë se bëja ndonjë gjë, ai kurrë nuk më thoshte: “Përse e bërë këtë?”

     Profeti (Paqja dhe bekimi i Allahut qofshin mbi të!) kishte moralin më të mirë, ashtu siç na lajmëron Allahu i Madhëruar kur ka thënë: “Vërtet, ti Muhamed je në një shkallë të lartë morali.” (Kalem, 4)

     Profeti (Paqja dhe bekimi i Allahut qofshin mbi të!) u fliste sahabëve për efektin e moralit dhe qëndrimit të mirë në formimin e personalitetit dhe në rritjen e statusit të personit nga ana e Allahut të Madhëruar dhe njerëzve. Profeti (Paqja dhe bekimi i Allahut qofshin mbi të!)  i këshillonte ata duke u thënë: “Më i miri prej jush është ai që ka qëndrimin më të mirë ndaj të tjerëve.”

     Sahabët, burrat dhe grate, i dëgjonin mësimet për fisnikërinë e Profetit (Paqja dhe bekimi i Allahut qofshin mbi të!)  dhe e shikonin me sytë e tyre mënyrën e shkëlqyer në të cilën ai vepronte me njerëzit. Kështu u themelua shoqëria e tyre, e cila kurrë nuk barazohet me ndonjë tjetër në historinë e njerëzimit.

    Nëse qëndrimet, morali dhe sjelljet  ndërmjet jomuslimanëve janë rezultat i rritjes dhe  edukimit të mirë, ndërmjet muslimanëve qëndrime të tilla të mira vijnë, mbi të gjitha, nga Islami, i cili formon moralet e mira, një karakteristikë bazë kjo e muslimanëve e cila e rrit statusin në këtë botë dhe peshon ndjeshëm në të mirë të tij në ahiret. Asnjë vepër nuk do të ketë më shumë peshë Ditën e Gjykimit sesa morali i mirë i një njeriu. Profeti (Paqja dhe bekimi i Allahut qofshin mbi të!)  ka thënë: “Asgjë nuk do të peshojë më rëndë në peshoren e besimtarëve në Ditën e Gjykimit sesa qëndrimi (morali) i mirë ndaj të tjerëve. Allahu i urren ata që thonë fjalë të turpshme (përbuzëse) dhe fjalime të pahijshme.”

     Islami, gjithashtu, i përshkruan ata që kanë qëndrimin më të mirë ndaj të tjerëve si më të dashurit e Allahut të Lartësuar nga robërit e tij. Kjo shihet qartë në hadithin e Usame ibn Shurejh, i cili thotë se ishin ulur me Profetin (Paqja dhe bekimi i Allahut qofshin mbi të!)  sikur kishim zogj në kokat tona, askush nga ne nuk fliste. Disa njerëz erdhën tek ai dhe e pyetën: “Kush është më i dashur tek Allahu nga robërit e tij?” Ai tha: “Ata që janë më të mirë në qëndrim (moral) ndaj të tjerëve.”

     Nuk është e çuditshme që njeriu me moral apo qëndrim më të mirë me të tjerët, të jetë më i dashur tek Allahu sesa të tjerët, pasi trajtimi i mirë i të tjerëve është një pikë e rëndësishme e ligjit islam. Ajo është vepra më e rëndësishme që mund të vendoset në peshoren e muslimanëve në Ditën e Gjykimit, siç e kemi parë. Ai (morali) është i barabartë me  namazin dhe agjërimin, bazat më të mëdha të Islamit, siç thotë Profeti (Paqja dhe bekimi i Allahut qofshin mbi të!): “Asnjë vepër më e madhe nuk do të vendoset në peshore, përveç qëndrimit të mirë ndaj të tjerëve. Qëndrimi i mirë ndaj të tjerëve do ta ngrejë person në shkallën e agjërimit dhe namazit.”

     Ai i cili nis të shfletojë mësimet islame mbi çështjet sociale, do të gjendet përballë një numri të madh mësimesh, të cilat inkurajojnë çdonjerën prej këtyre karakteristikave të dobishme. Kjo është një tregues i çështjes së madhe islame për formimin e personalitetit shoqëror të muslimanit, në mënyrën më të saktë. Kështu, ajo nuk ndalon vetëm me përmendjen e gjërave të përgjithshme, por ajo, gjithashtu, ka të bëjë me çdo çështje të vogël morale, e cila mund të formojë aspekte individuale të personalitetit të integruar shoqëror. Kjo gjithanshmëri  nuk ekziston në sisteme të tjera sociale, ashtu siç ndodh në Islam.

    Tani e tutje, kërkuesi i cili nis të zbulojë karakterin e gruas muslimane, nuk ka asnjë alternativë tjetër, vetëm se të ekzaminojë të gjitha këto tekste dhe të kuptojë drejtimin (udhëheqjen) dhe legjislacionin që përmban ato. Vetëm atëherë do të jetë i aftë të kuptojë personalitetin fisnik shoqëror, i cili është i vetëm te muslimanët, burra apo gra qofshin.

Përktheu: Manjola Tafa

01.02.2006