Pyetja:

Pse kur dua të mësoj dhe të interesohem rreth fesë fitoj një frikë shumë të madhe?

Përgjigja:

Falenderimet i takojnë Allahut, paqja dhe bekimet e Tij qofshim mbi të dërguarin e Tij Muhamed, mbi familjen, shokët dhe të gjithë ata që ndjekin rrugën e tij deri në Ditën e Gjykimit.

Motër e nderuar,

Së pari, ju përshëndesim dhe ju dëshirojmë mirëseardhje në faqen tonë, lusim Allahun e Lartësuar t’ju mundësojë që sa më shpejt të filloni t’i shtoni njohuritë tuaja rreth fesë dhe frikën që po e ndieni ta shndërrojë në lumturi, dashuri dhe kënaqësi se me të vërtetë vetëm nëse filloni ta mësoni këtë fe dhe e bëni sistem të jetës tuaj, atëherë ju do ta kuptoni esencën e lumturisë, pasi Islami është fe ku ai i cili e praktikon atë e gjen shpëtimin në këtë botë dhe botën tjetër. 

Kurse sa i përket problemit nga i cili ankoheni, themi se mund të jenë njëra nga dy arsyet që do t’i përmendim ose edhe të dyjat së bashku.

1.Mund të jetë që këtë ta keni nga shejtani që fut në zemrën tuaj frikë që ju të largoheni nga kjo e mirë dhe ai vazhdimisht i bën kurthe njerëzve të largohen nga të nënshtruarit e Allahut, Krijuesit të çdo gjëje. Prandaj ti mendo dhe dije se Allahu është i mëshirshëm ndaj robërve, është falës ndaj njerëzve. Pastaj dije se nuk është e keqja në atë se ti ke bërë mëkat, por e keqja është që njeriu të vazhdojë në mëkate dhe të mos i kthehet Zotit të botrave, i Cili sheh dhe përcjell çdo lëvizje tëndin.

2.Mund të jetë se kjo frikë që ju kaplon është rezultat i botëkuptimit të mëhershëm që keni ndaj Islamit, për shkak se shumë nga njerëzit fenë Islame e lidhin me disa gjëra që për disa njerëz janë të frikëshme si: vdekja, varrezat, shkuarja për të shkruar hajmali te disa “hoxhallarë” të rrejshëm, dhe gjëra të ngjashme.

Prandaj, ju këshillojmë që ju keni nevojë të shoqëroheni me njerëz që e njohin Islamin burimor dhe ke mundësi të përfitosh nga ata dhe t’i largosh nga vetja  këto  botëkuptime të gabuara.

Motër e nderuar!

Dije një gjë dhe këtë po ta them nga zemra, uallahi, nëse ti ke frikë për diçka kur po interesohesh rreth Islamit, dije se kjo frikë është mashtruese për ty, por ajo që duhet të të friksojë ty duhet me qenë realiteti yt tani kur ju jeni larg nga Krijuesi yt dhe shpresa nga Mëshira e Tij.

Alaudin Abazi

06.04.2006