Pyetja:

Një motër muslimane ka qenë në kishë me një shoqen e saj katolike, si çdo të dielë që falen katolikët ajo me të ka shkuar në kishë në kohën a faljes, por nuk tha a i ka bërë apo nuk i ka bërë gjërat që i bëjnë ata. Desha t'ju pys se a është mëkat nëse hyn një musliman në kishë në kohën a faljes së tyre? 

Përgjigje:

Falenderimet i takojnë Allahut, paqja dhe bekimet e Tij qofshim mbi të dërguarin e Tij Muhamed, mbi familjen, shokët dhe të gjithë ata që ndjekin rrugën e tij deri në Ditën e Gjykimit.

Shkuarja në kishë pa ndonjë qëllim vetëm për të shikuar, apo në shoqëri nuk ka ndonjë ndalesë apo dispozitë që ndërlidhet me të.

Në një hadith që transmeton Buhariu tregohet se Umu Seleme dhe Umu Habibe ia përmendin Resulullahut (salallahu alejhi ue selem) një kishë që e kishin parë në Etiopi (Abisini) në të cilën kishte vizatime (e skulptura). Muhamedi (Paqja dhe bekimi i Allahut qofshin mbi të!) thotë: “Ata janë popull që kur në mesin e tyre jeton një njeri i mirë dhe vdes, në varrin e tij i ndërtojnë faltore dhe bëjnë në to këto vizatime. Ata janë njerëzit më të këqinj.”

Nga ky hadith vërejmë se si Profeti nuk ua tëhoqi vërejtjen se kanë hyrë në kishë, por vetëm sqaroi se sa e keqe është vepra e atyre njerëzve që bëjnë.

Në fund themi se nëse muslimani hyn në kishë vetmëm për vizitë nuk ka mëkatë, por duhet ta ketë parasysh çdonjëri se përzierja me njerëzit e besimeve të tjera dhe shkuarja në vende të tilla mund të ndikoj në dobësimin e besimit të tij, posaçërisht nëse ai nuk ka njohuri aq shumë rreth Islamit dhe mirësive të tij. Prandaj themi se për muslimanin më mirë është të mos prezantoj në vende të tilla. Allahu e di më së miri.

Alaudin Abazi

30.03.2006