Pyetja:

Si qëndron puna me ata që pajtohen për një çështje apo që premtojnë dhe lidhin besë për hir të Zotit për një çështje dhe më pas për shkak të tekave dhe qejfeve të veta e prishin atë? Apo si qëndron puna me atë person që premton fejesën, pa marrë parasysh situatat aktuale në të cilat mund të gjendemi dhe ndërkohë për shkak të qejfeve të veta dhe të njerëzve të vet e refuzon një gjë të tillë, e siç dihet po ia merr kohen dhe angazhimet personit të kundërt dhe ndoshta po e lëndon shumë rëndë dhe mund lirisht të konkludojmë se kjo është tradhti parabashkëshortore. Si gjykon Islami për tradhti të tilla me të cilat u shkaktohet humbje dhe dëm i madh personave që u bëhet tradhti? Ju faleminderit për përgjigjen, Zoti ju bekoftë!


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Nuk e kemi shumë të qartë për problemin për të cilin na shkruani, por si duket është fjala për ndonjë marrëveshje e fejesës që keni pasur me dikë apo që keni qenë afër saj dhe tani pala me të cilën jeni marrë vesh, nuk dëshiron më që të realizohet kjo fejesë.

Sido që të jetë, nëse për këtë ekziston arsye, edhe pse ju nuk jeni në dijeni për ato arsye, atëherë në këtë nuk ka mëkat dhe të keq. Por nëse nuk ka arsye, atëherë parimisht besimtari duhet ta përmbushë premtimin e tij dhe tërheqja në këto raste nuk është shenjë e mirë.

Çështja e vendimit për martesë nuk është një gjë e thjeshtë dhe nuk është një punë që ka kthim mbrapa, apo edhe nëse ka, atëherë pas vetes lë pasoja, prandaj mendojmë se ndoshta më mirë është të merret vendim tani sesa kur puna shkon më larg dhe atëherë kur pasojat janë më të mëdha. Me fjalë të tjera, themi se është e mundur që pala tjetër t'i ketë arsyet e veta pse nuk pranon të përmbushet kjo marrëveshje dhe më mirë është që vendimi i tyre të bëhet tani sesa më vonë. Ndoshta ky vendim për ju është jo i mirë apo nuk ju pëlqen, por dijeni se Allahu i Lartmadhëruar në caktimin e Tij ka urtësi dhe njohuri të cilat ne nuk i kuptojmë ose do t'i kuptojmë më vonë. Allahu i Madhëruar thotë:

“Mund ta urreni një gjë, por ajo është e mirë për ju; e mund të doni një gjë, por ajo është e dëmshme për ju. Allahu e di e ju nuk e dini.” (Bekare, 216)
Prandaj, vëlla i nderuar, ju këshillojmë që të përmbaheni për këtë vendim të palës tjetër dhe të mos nxitoni që të mendoni se kjo shkon në dëm tuajin, për arsye se shumë herë neve na ndodh që të kemi dëshira të ndryshme, por ato të jenë të dëmshme për ne dhe e kundërta. Lus Allahun e Lartësuar t'ju japë të mirën në këtë botë dhe në botën tjetër! Amin!