Pyetja:

Es-selamu alejkum!
Doja t’ju pyesja se si duhet të veprojë një grua muslimane në rast se (Allahu mos na sprovoftë) përpiqen ta rrëmbejnë... pasojat dihen.
E di se duhet të rezistojë sa mundet, por po qe se ndodhet para grykës së një revolveri duhet të kundërshtojë apo t’u bindet? A vlen e njëjta gjë edhe kur je (Allahu na ruajttë) fare pranë një thike?
Allahu ju shpërbleftë!


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Është një parim i përgjithshëm në dispozitat islame se në raste të jashtëzakonshme, kur njeriu detyrohet ta shkelë ndonjë ligj ose ndalesë qoftë nga frika, dhuna, vdekja apo ndonjë rrethanë tjetër të ngjashme, atëherë personi i këtillë është i arsyetuar dhe nuk llogaritet shpërfillës. Allahu i Lartësuar në lidhje me shkeljen e mëkatit më të rëndë, mosbesimit (kufrit), e përjashton nga dënimi personin i cili e bën këtë (kufirin), kur ai është i detyruar dhe nga frika, por me kusht që këtë ta bëjë vetëm me gjuhë, duke e urryer veprimin e tillë me zemër. Ai në Kuran thotë:
“Kushdo që mohon Allahun, pas pranimit të besimit, (do të dënohet ashpër), përveç atij që është i detyruar me forcë, ndërkohë që zemra e tij është plot besim. Ndërsa ata që ia hapin zemrën mosbesimit, do të kenë mbi vete zemërimin e Allahut dhe një dënim të madh.” (Nahl, 106)
Nga ky ajet kuptojmë se njeriu i cili shkel ndonjë ndalesë dhe për këtë është i detyruar, atëherë i personi i këtillë është i falur për shkeljen e asaj dispozite.
Prandaj nëse edhe femra në ndonjë rrethanë të jashtëzakonshme, detyrohet ta shkelë ndonjë dispozitë atëherë nuk ka mëkat, posaçërisht nëse janë situatat të cilat ju i përshkruani. Allahu i Lartësuar konkretisht për këtë thotë:
“...Nëse ndokush i detyron ato (femrat për amoralitet), Allahu do të jetë Falës dhe Mëshirëplotë për to.” (Nur, 33)
Mirëpo këtu duhet të kemi parasysh se jo çdo rrethanë mund të konsiderohet e justifikueshme për të shkelur besimtari ndonjë dispozitë. Sido që të jetë, kjo problematikë diskutohet mjaft mirë nga dijetarët islamë në vende të shumta në librat e jurisprudencës islame, madje ekzistojnë edhe studime e disertacione të ndryshme që rrahin problemin kur njeriu konsiderohet i detyruar dhe kur jo, pastaj edhe cilat dispozita mund të shkelen dhe cilat jo dhe kështu me radhë.