Pyetja:

Selam alejkum! Doja të pyesja imamin se n.q.s. një nga netët teke të 10 ditëshit të fundit të Ramazanit nuk e agjëroj dhe ajo mund të ketë qenë Nata e Kadrit, n.q.s. e agjëroj atë ditë pas Ramazanit, më quhet sikur kam agjëruar Natën e Kadrit?


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Fillimisht besimtari duhet ta kuptojë se Allahu i Lartësuar nuk e ngarkon robin e Tij me një gjë që nuk mund ta përballojë, ashtu si nuk e merr në përgjegjësi për gjërat të cilat i neglizhon me arsye. Prandaj nëse njeriu e lë pa agjëruar ndonjë ditë prej ditëve të Ramazanit, qoftë edhe Natën e Kadrit, por me arsye; është i sëmurë apo është në udhëtim dhe agjërimi i bën dëm atij, atëherë ai me lejen e Allahut nuk do të privohet nga shpërblimi të cilin do ta fitonte po të ishte i shëndoshë dhe të kishte mundësinë ta agjëronte atë ditë dhe të bënte ibadet atë natë. Dija e Allahut është absolute dhe e përfshin edhe atë që e kemi bërë, por edhe atë që nuk e kemi bërë dhe po të ishte e mundur nga ne ta bënim, se si do ta bënim. Për këtë themi se nëse një besimtar gjatë viteve të mëhershme ka qenë i kujdesshëm që dhjetë netët e fundit të jetë i përkushtuar dhe ta shtojë adhurimin që ta arrijë Natën e Kadrit, por në këtë Ramazani i ndodhi atij ndonjë pengesë sikurse sëmundja, atëherë Allahu nuk do t`ia humbë vazhdimësinë e veprave, pasi ai nuk e neglizhoi me vetëdashje, por me arsye. Muhamedi, lavdërimi dhe paqja qofshin mbi të thotë: “Nëse robi i Allahut sëmuret apo shkon në udhëtim, atij i shënohen shpërblimet të cilat i kryente, kur ishte në shtëpi dhe ishte shëndoshë.” (Shënon Buhariu)
Allahu e di më së miri!

 

Alaudin Abazi
4.10.2009