Pyetja:

Selamu alejkum!
Kisha një pyetje rreth namazit të sabahut.
Kur falet namazi i sabahut në shtëpi, a mundet që të falet edhe nëse ende s’është thirrur ezani nëpër xhami, por koha e imsakut ka 1 orë apo më shumë që ka hyrë. Nëse po, pas sa kohe bën të falet ky namaz prej kur ka hyrë koha e imsakut?
Po nisem gjithmonë nga ajo se ka disa xhami që e thërrasin ezanin e sabahut më herët e disa më vonë, por në një periudhe kohe 10-15 minuta në mes tyre. Allahu ju shtoftë diturinë!


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Hyrja e kohës së namazit nuk ndërlidhet domosdoshmërisht me thirrjen e ezanit në xhami kjo për faktin se është e mundur që një kohë e namazit të hyjë në orën e caktuar me kalendar (takvim), mirëpo xhemati të merret vesh ta thërrasin ezanin disa minuta më vonë, sikurse ndodh në namazin e drekës. Hyrja e kohës së namazit të drekës me kalendar gjatë verës është përafërsisht në ora 12:30, mirëpo në të gjitha xhamitë ezani thirret në ora 13:00. Prandaj nëse muslimani për ndonjë shkak të arsyetuar nuk mund të dalë në xhami ose do të udhëtojë para ezanit të drekës, atëherë atij i lejohet ta falë drekën me përcaktimin e kalendarit në orën 12:30, edhe pse ende nuk është thirrur ezani në xhami. Gjithashtu edhe gruas që falet në shtëpi, i lejohet ta falë drekën ashtu siç është paraparë me kalendar, edhe në qoftë se ezani ende nuk është thirrur në xhami.

Gjithashtu edhe namazi i sabahut nuk ndërlidhet me ezanin e sabahut që thirret në xhami. Te ne rëndom ezani i sabahut nëpër xhami thirret pesëdhjetë minuta para lindjes së diellit, ndërsa koha e faljes hyn shumë më herët se kjo. Koha e tij hyn 18 minuta pas imsakut. Kjo është kështu duke pasur parasysh kalendarët, të cilat bëjnë llogaritjen e kohëve në rajonin e Ballkanit; në Shqipëri, Kosovë, Maqedoni dhe Bosnje. Nëpër këta kalendarë bëhet vërejtja se ekziston një kohë prej 18 minutash nga imsaku deri në kohën e sabahut, prandaj ne duhet të presim për aq kohë pas imsakut që ta falim namazin e sabahut. Allahu e di më së miri!