Pyetja:

Selam alejkum! E kam një pyetje. Dje, derisa isha agjërueshëm, u ula dhe shikova tv një serial. Aty ishte një skenë erotike të cilën nuk e shikova, por u ndjeva disi ndryshe edhe pse s’e pashë, u ndjeva me epsh. Kjo zgjati disa orë, pastaj u pastrova, mora gusël dhe fala ikindinë. Nuk jam e sigurt nëse kam pasur orgazëm, se s’kisha shenja të mëdha. Pyetja ime është nëse jam bërë xhunub, a e kam prishur agjërimin edhe a kam qenë e pastër për të agjëruar sot pasi jam pastruar dhe kam marr guslin gjatë asaj dite kur ka mundur të ndodhë orgazma? Ju faleminderit shumë, Allahu ju shpërbleftë!


Përgjigjja:

Alejkum selam ue rahmetullahi ue berekatuhu!

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Para se t'i përgjigjem pyetjes tënde, dua të ta përkujtoj që mëkati në Ramazan është shumë më i madh sesa jashtë Ramazani ashtu sikurse edhe shpërblimet janë më të mëdha në Ramazan sesa jashtë Ramazani.
Shikimi i filmave që kanë përmbajtje erotike nuk është i lejuar edhe jashtë Ramazanit, kurse në Ramazan harami është edhe më i madh.

Allahu xh.sh. ka thënë: “Thuaju besimtarëve të ndalin shikimet (prej haramit), t’i ruajnë pjesët e turpshme të trupit të tyre se kjo është më e pastër për ta. All-llahu është i njohur hollësisht për atë që bëjnë ata. Thuaju edhe besimtareve të ndalin shikimet e tyre, t’i ruajnë pjesët e turpshme të trupit të tyre, të mos zbulojnë stolitë e tyre përveç atyre që janë të dukshme, le të venë shamitë mbi kraharorin e tyre.” (En-Nur 30-31)

Allahu xh.sh. në këtë ajet i urdhëron meshkujt edhe femrat të ulin shikimet e tyre, pra mos të shikojnë gjininë tjetër, dhe ky ajet ka për qëllim mos t'i shikojnë nëpër rrugë duke e ditur se nuk janë duke bërë dashuri apo nuk janë të zhveshur, kurse të shikosh gjininë tjetër duke bërë marrëdhënie apo të shikosh skena erotike ky është një haram edhe më i madh për të cilin duhet të pendohesh sinqerisht tek Allahu xh.sh.

Sa i përket pyetjes tënde për agjërimin tënd, kjo varet nga gjendja jote, se a je bërë xhunub apo jo.

1. Nëse nuk je bërë xhunub, atëherë nuk e ke prishur agjërimin dhe agjërimi yt është në rregull.

2. Kurse nëse je bërë xhunub, e ke për obligim ta kompensosh këtë ditë.