Pyetja:

isha një pyetje. Nuk e di si mund të shpjegohet, por shpresoj ta tregoj sa ma mirë që mundem. Kohën e fundit më së shumti, nëse shikoj ose lëshoj shikim në mure ose kudo që drejtoj shikimin, më tërheqin vëmendjen disa figura, disa fytyra të çuditshme. Nuk e di, ndoshta xhinë, nuk kuptoj pse më dalin, pse i shoh. Shpresoj të mos kem gabuar ndokund që më shfaqen këto pamje. Shpresoj të keni përgjigje për këtë rast dhe mundësisht si t’i largoj këto pamje. Kam frikë se ndoshta mos ndodh diçka më shumë se kaq. Zoti ju shpërbleftë!


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Motër e nderuar, është vështirë t`ju japim ndonjë përgjigje të drejtpërdrejtë duke e pasur parasysh vetëm përshkrimin e problemit që bëni në letrën tuaj. Sido që të jetë, themi se problemi juaj mund të jetë njëra nga këto dy gjërat:

1. Problemi juaj është thjesht psikik dhe ju ballafaqoheni me halucinacione. Halucinacionet janë perceptime të sendeve dhe dukurive që nuk ekzistojnë realisht në mjedisin e jashtëm. Kemi dy lloje halucinacionesh:
- Pamore (vizive), që ndahen në të thjeshta dhe të ndërlikuara, kur personi shikon kafshë, figura e gjëra të tjera, si në rastin tuaj.
- Dëgjimore (auditive), të thjeshta, kur dëgjon zëra të papërcaktuar si zile, krisma, zëra njerëzish dhe të ndërlikuara, që kanë simptoma të veçanta.
Prandaj ndoshta do të ishte e nevojshme të bëni një vizitë te psikologu apo psikiatri e të bëni një bisedë me të dhe pa dyshim kjo do t`ju ndihmojë në evitimin e problemit.

2. Është e mundur të keni problem me magji ose me xhinët dhe në këtë rast gjithashtu ju këshillojmë që të vizitoni ndonjë hoxhë e të bisedoni me të rreth problemit pak më konkretisht dhe kështu do të mund të gjenit ndonjë përgjigje adekuate, për gjërat që i shihni. Njëkohësisht ju këshillojmë të keni kujdes nga shkuarja tek ata të vetëquajturit hoxhallarë, të cilët merren me mashtrimin e njerëzve, duke pretenduar se shërojnë, madje edhe me gjëra të ndaluara.

Në fund, ju këshillojmë që ta keni parasysh se mbrojtja më e mirë për besimtarin është që ai të jetë në përputhje me mësimet të cilat na ka porositur Islami dhe i Dërguari i Allahut, lavdërimi dhe paqja qofshin mbi ne. Prandaj, motër e nderuar ju kujtojmë që ta keni parasysh faljen e namazit me rregull, pasi arma më e fortë e besimtarit është që ai të jetë sa më afër Krijuesit të tij dhe kjo më së miri arrihet duke i kryer obligimet ndaj Tij dhe duke u larguar nga ndalesat e Tij. Lus Allahun e Lartësuar t`ju mbrojë nga cytjet dhe tendencat e qëllimkëqijve, qofshin ata nga njerëzit apo xhinët dhe t`ju shpërblejë me të mira në këtë botë dhe në botën tjetër. Amin!