Pyetja:

Selam alejkum e nderuara redaksi!
Desha t’ju drejtohem me një pyetje. Çfarë mendimi keni rreth rastit që është shfaqur në internet të fëmijës nga Dagestani me shkrime kuranore në trupin e tij. Jam rrëqethur dhe sinqerisht ju them se më ka ardhur të qaj, duke pasur parasysh fuqinë e Allahut xhele shanuhu, pa e kuptuar njerëzimi ende çfarë është në gjendje të bëjë Ai. Allahu na mëshiroftë.
Selam alejkum ue rahmetullah!


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen, shokët dhe të gjithë ata që ndjekin rrugën e tij deri në Ditën e Gjykimit!

Është më se e saktë se kjo video ka bërë një sensacion kur doli, posaçërisht te muslimanët, të cilët pothuajse u ndanë në dy qëndrime; ata që mohonin kategorikisht dhe ata që e pritën me gëzim, magjepsje dhe plot emocion. Për shkak të rëndësisë do të flasim rreth këtij lajm dhe lajmeve të ngjashme në pika:
1. Qëndrimi i besimtarit në lidhje me këtë ndodhi si dhe ndaj lajmeve të këtilla duhet të jetë e mesmja nga dy skajshmëritë e përmendura më lart. Me një fjalë, besimtari nuk e mohon këtë ngjarje kategorikisht, pasi është e mundur të ndodhë, ashtu si ndodhin shumë mrekulli e fenomene të ndryshme në botë. Por, gjithashtu është shumë e mundshme të jetë një lojë e radhës me të cilën tentohet të mashtrohen njerëzit, pa marrë parasysh kush është ideatori i këtij mashtrimi. Prandaj duhet të jemi të përmbajtur dhe të mos lëshohemi në njërin qëndrim duke u munduar ta ndihmojmë atë duke kritikuar të tjerët që kanë mendim tjetër.

2. Kështu duhet të jetë metodologjia jonë, jo vetëm në lidhje me këtë lajm, por në përgjithësi karshi lajmeve të natyrave të këtilla të cilat kohë pas kohe përhapen ndër njerëzit. Allahu i Lartësuar në Kuran thotë:
“O ju që keni besuar! Nëse ndonjë njeri i pandershëm ju sjell ndonjë lajm, sigurohuni mirë (në është i vërtetë), për të mos I bërë dëm ndokujt padashje, e të pendoheni pastaj për atë që keni bërë.” (Huxhurat, 6)
Pra me këtë ajet Allahu i Madhëruar na porosit që të mos nxitojmë në sjelljen e gjykimeve në lidhje me informacionet të cilat i marrim para se t’i vërtetojmë, se a janë të vërteta në fakt apo jo, pasi me konkluzionet të përshpejtuara mund t`u bëjmë dëm të tjerëve.

3. Ngjarjet e këtilla nuk duhet të trajtohen si bazike në nxjerrjen e ndonjë dispozite apo pohimin, respektivisht mohimin e ndonjë gjëje. Na mjafton Libri i Allahut (Kurani) dhe fjalët e Muhamedit, lavdërimi dhe paqja qofshin mbi të, si paralajmërues dhe përkujtues. Në këto dy burime kemi mjaft përkujtime dhe tërheqje vërejtjeje, ndërsa gjërat e tjera, të cilat nuk janë të sakta dhe në të cilat kemi dyshime, nuk duhet të merren për bazë për të vërtetuar fuqinë e Allahut, ashtu si do ta komentonte dikush këtë ndodhi. Kemi mjaft argumente për ta vërtetuar madhërinë dhe fuqinë e Allahut dhe nuk ka nevojë të përdorim me këso lloj lajmesh të pasigurta. Mund të paramendohet se në çfarë pozite e vëmë veten duke u marrë me lajme të këtilla dhe duke bërë thirrje që njerëzi t’i besojnë madhërisë së Allahut dhe fuqisë së tij me këto argumente, kur pas një kohe del në shesh se kjo e tëra ishte mashtrim dhe gënjeshtër.

4. Në disa përgjigje të mëhershme rreth problemeve të këtilla kemi dhënë disa përgjigje, prandaj mund të lexoni aty se çfarë vështrimi u kemi dhënë edhe atëherë atyre ndodhive:
- Në Rusi kishin dalë dy sy në qiell
- Na dërgoni ndonjë informacion nëse është apo jo e vërtetë?
- A mund të më dërgoni një informacion me fakte dhe fotografi?

5. Gjithashtu para një kohe më rastisi të lexoj një temë të përkthyer nga hoxha Sedat Islami, me titull: “Feja jonë nuk ka nevojë për gënjeshtra”. Në këtë temë shkruesi tregon se si është futur në disa forume që kanë si objektiv sulmin e Islamit dhe mësimeve të tij dhe ai tregoni se ka njerëz të cilët qëllimisht shpikin trillime të ndryshme dhe me to i përqeshin muslimanët të cilët i përpijnë shumë lehtë ato gënjeshtra. Ndër këto trillime janë edhe disa për të cilat kemi folur edhe ne dhe kemi sqaruar se janë mashtrime, sikurse lajmi rreth një vajze e cila është shndërruar në një qenie tjetër pasi ia ka marrë Kuranin nënës nga duart dhe ia ka hedhur në tokë, etj.
Ndër gënjeshtrat e përhapura ai i përmend edhe këto:

Gënjeshtra: Historia e djaloshit, varrin e të cilit e hapen për obduksion të kufomës pas tri orësh dhe e gjetën të djegur nga zjarri i varrit.
Realiteti: Në realitet, fotoja ishte e kufomës së një vajze, e cila qe djegur në një aksident.

Gënjeshtra: Fotoja e një xhini, të cilin një i ri nga Emiratet e Bashkuara Arabe e kishte fotografuar në një shpellë, me ç'rast kishte vdekur menjëherë pas këtij fotografimi.
Realiteti: Xhini, i përshkruar në foto, në realitet ishte një skulpturë e gdhendur në një shpellë, sytë e së cilës (skulpturë) ishin të lidhura me një çelës elektrik për ndriçimin e syve me poç elektrik të kuq.

Gënjeshtra: Fotoja e një kopshti gjerman ku rrënjët e pemëve ishin lidhur e formësuar në të dy anët si dëshmia: La ilahe il-la Allah Muhammedun Resulullah!, duke mos fshehur edhe atë se kopshti nga autoritetet gjermane është mbyllur.
Realiteti: Fotoja ishte një pikturë e një artisti, emri i të cilit qe fshirë nga piktura.

Gënjeshtra: Në një spital amerikan një aparat kishte fotografuar zemrën e një pacienti në të cilën shkruante emri ALLAH!.
Realiteti: Fotoja është përhapur nga një forum çifut që të përqeshet Islami.

Gënjeshtra: Majkëll Xheksoni bëhet musliman.
Realiteti: Majkëll Xheksoni ka shpallur se ka respekt për këtë fe dhe mohon se është musliman e: "Allahu nuk është i nevojshëm për njerëzit". (Ali Imran, 97)

Gënjeshtra: Fotot e dy haremeve, Qabesë dhe Xhamisë së Pejgamberit alejhis selam, të cilat nga incizimet e bëra me satelit shndrisin gjatë natës.
Realiteti: Fotoja është punuar me Fotoshop (program). Është marre fotoja gjatë ditës, i janë fshirë objektet që i rrethojnë e më pas është bërë punim artistik me të. Ndryshe, nuk ka të vërtetë këtu.

Gënjeshtra: Një foto nga NASA që paraqet hënën me një vijë në mes duke vërtetuar kështu faktin e çarjes së Hënës nga Muhamedi alejhis selam.
Realiteti: Edhe kjo foto është prodhim i Fotoshop-it. Pra, nuk është e vërtetë ngase këtë lajm askund nuk e kemi hasur në burimet e NASA-s.

Gënjeshtra: Pema e bekuar, e zbuluar në Egjipt, në të cilën është gdhendur emri më i madh i Allahut.
Realiteti: Gdhendja është bërë nga dora e njeriut dhe nuk bëhet fjalë për tjetër gjë.

6. Në përmbyllje themi se besimtari duhet të jetë i vetëdijshëm dhe të mos pranojë të lëshohet në lajme të këtilla, duke i përhapur pa u siguruar mirë vërtetësinë e tyre. Por edhe nëse diçka nga kjo është e saktë, atëherë ai gjithashtu duhet ta kuptojë se argumentet e qarta dhe më bindëse gjenden në Librin e Allahut dhe Sunetin e të Dërguarit të Tij, lavdërimi dhe paqja qofshin mbi të dhe fatkeqësia më e madhe e myslimanëve ushte atëherë kur ata filluan t’u japin përparësi gjërave të tjera në llogari të këtyre dy burimeve. Allahu e di më së miri!